कविता
आजकल किन यस्तै यस्तै लाग्छ ?
मुटु बाँधिए झैं लाग्छ,
धड्कन थामिए झैं लाग्छ,
श्वास अड्किए झैं लाग्छ,
प्राण फर्किए झैं लाग्छ,
खै किन आजकल मलाई यस्तै यस्तै लाग्छ ?
आशा पोखिए झैं लाग्छ,
रहर तोकिए झैं लाग्छ,
भरोसा ठोकिए झैं लाग्छ,
सम्मान जोखिए झैं लाग्छ,
किन किन आजकल मलाई यस्तै यस्तै लाग्छ ?
झूठ झाँंगिए झैं लाग्छ
भ्रम फक्रिए झैं लाग्छ,
धोखा मौलिए झैं लाग्छ,
घात चौडिए झैं लाग्छ,
कता कता आजकल मलाई किन यस्तै लाग्छ ?
आत्मसम्मान लत्रिए झैं लाग्छ,
आत्मविश्वास थलिए झैं लाग्छ,
कर्तब्य परायणता मक्किए झैं लाग्छ,
मानवता सक्किए झैं लाग्छ,
साँच्चै मलाई आजकल किन यस्तै यस्तै लाग्छ ?
कमला डिसी । काठमाडौं