बाँकेका तीन पालिकामा १३ पटकसम्म लगातार औषधी खुवाउँदा पनि हात्तीपाइले रोगका सङ्क्रमित भेटिएपछि १४ औं पटक औषधी खुवाउने अभियान सुरु गर्न लागिएको छ । ती पालिकामा सबैले औषधी नखाइदिएकै कारणले हात्तीपाइले रोगका सङ्क्रमित भेटिएको हुँदा १४ औ पटक यो अभियान सञ्चालन गर्न लागिएको स्वास्थ्य कार्यालय बाँकेले जनाएको हो ।

जिल्लाको नेपालगन्ज उपमहानगरपालिकामा फागुन ५ तथा डुडुवा र नरैनापुरमा फागुन ७ गतेदेखि आम औषधी सेवन अभियान सुरु हुन लागेको स्वास्थ्य कार्यालय बाँकेका प्रमुख अंगदबहादुर शाहीले बताए । हात्तीपाइले रोगविरुद्धको आम औषधी सेवन कार्यक्रमबारे पत्रकारसँग बुधवार आयोजित अन्तरक्रिया कार्यक्रममा शाहीले केहीले औषधि खाने र केहीले नखाइदिने गरेका कारण समुदायस्तरमा हात्तीपाइलेको जोखिम कायमै रहेको बताए ।

उनका अनुसार सो अभियान अन्तर्गत बाँकेमा दुई लाख ५७ हजार बढीलाई औषधि खुवाइँदैछ । नेपालगन्जमा एक लाख ६४ हजार ९६ जना, डुडुवामा ४२ हजार १७४ जना र नरैनापुरमा ४२ हजार ३६९ जना तथा बैजनाथको वडा नम्बर चारमा आठ हजार ९६२ जना गरी जम्मा दुई लाख ५७ हजार ६०१ जनालाई औषधि खुवाउने लक्ष्य छ ।

यस पटक लक्षित सबैलाई औषधी खुवाउने गरी अभियान सञ्चालन गरिने जनाउँदै स्वास्थ्य कार्यालय बाँकेका अधिकृत दुर्गा गौतमले त्यसका लागि वडाध्यक्षको नेतृत्वमा धार्मिक अगुवा, समाजसेवी, महिला अगुवा, शिक्षक र राजनितिक कार्यकर्ताहरु घरघरमा पुग्ने गरी योजना बनाइरहेको बताइन् ।

नेपालगन्ज उपमहानगरपालिका, डुडुवा गाउँपालिका र नरैनापुर गाउँपालिका तथा बैजनाथ गाउँपालिकाको वडा नम्बर चारमा १.८ देखि २.५ प्रतिशतसम्म प्रिभेलेन्स (व्यापकता) देखिएको इपिडेमियोलोजी तथा रोग नियन्त्रण महाशाखाका वरिष्ठ जनस्वास्थ्य अधिकृत रामकुमार महतोले बताए ।

इपिडेमियोलोजी तथा रोग नियन्त्रण महाशाखा निर्देशक डा.यदुचन्द्र घिमिरेले नेपालबाट हात्तीपाइले रोग निवारण गर्न बाँकेका तीन पालिका मुख्य चुनौतीका रुपमा देखिएकाले यो पटक गम्भीरतापूर्वक लागिदिन सबै सरोकारवालालाई आग्रह गरे । कार्यक्रममा नेपाल पत्रकार महासङ्घ बाँकेका अध्यक्ष नवीन गिरी, नेपालगन्ज उपमहानगरपालिका स्वास्थ्य महाशाखा प्रमुख रामबहादुर चन्दले आम औषधि सेवन कार्यक्रमलाई प्रभावकारी बनाउन सबैको हातेमालोमा जोड दिए ।