युद्धले अरू देश ध्वंस हुँदा अमेरिका मालामाल !

सत्यपाटी संवाददाता । न्यूयोर्क

इजरायलदेखि इरान हुँदै रूससम्म युद्धले नोक्सानी भइरहेका वेला सन् २०२४ मा अमेरिकालाई भने सर्वाधिक फाइदा भएको छ । अमेरिकी स्टेट डिपार्टमेन्टद्वारा हालै जारी गरिएको विश्व सुरक्षा कारोबारको प्रतिवेदनअनुसार सन् २०२४ मा अमेरिकाले ४४१ खर्ब १२ अर्ब (४ निल ४१ खर्ब १२ अर्ब) नेपाली रुपैयाँको हतियार र रक्षा सम्झौता गरेको छ ।

उक्त कारोबार सन् २०२३ को अनुपातमा २९ प्रतिशतले अधिक हो । सन् २०२४ मा भएका रक्षा कारोबारमा अमेरिकी कम्पनीले २१९ खर्ब २० अर्ब (२ निल १९ खर्ब २० अर्ब) रुपैयाँको हतियार बेचे । उक्त व्यापार सन् २०२३ मा २१८ खर्ब ८ अर्ब रुपैयाँ थियो । सन् २०२४ मा अमेरिकी सरकारले अरू देशका सरकारसँग गरेका कारोबारको मूल्य १६३ खर्ब २० अर्ब रह्यो ।

यो अघिल्लो वर्ष भएका ११२ खर्ब रुपैयाँको सुरक्षा कारोबारको तुलनामा ४५.७ प्रतिशत बढी हो । अमेरिकी सरकार र अन्य देशका सरकारहरूबीच भएका १६३ खर्ब २० अर्ब रुपैयाँको सुरक्षा कारोबारमा १३४ खर्ब ८ अर्ब रुपैयाँको हतियार विक्री, मित्र देशलाई हतियार किन्न १६ खर्ब ३२ अर्ब रुपैयाँको आर्थिक सहयोग र साझेदार देशको रक्षा क्षमता बढाउन १ खर्ब २६ अर्ब ४० करोड रुपैयाँ पनि संलग्न छ ।