धन सम्पत्ति प्रशस्त हुनुमात्रै कुनै व्यक्ति वा परिवार समृद्ध हुनु होइन । सामाजिक प्रतिष्ठा तथा जीवनयापन गर्ने सुख सुविधा तथा सहजता समृद्धिको ठूलो मापक एवं सूचक हुन् । समाजमा पाइने सुविधा तथा सहजताभित्र धेरै कुरा अटेका हुन्छन् । स्वास्थ्य, शिक्षा, रोजगारी, हिँडडुल गर्न तथा बोल्न पाउने स्वतन्त्रता तथा सुविधाजस्ता मापक सूचकहरु राम्रा नभइकन व्यक्ति, परिवार तथा राष्ट्र समृद्ध वा सम्पन्न हुँदैनन् ।

आर्थिकरुपमा सम्पन्न हुनुु सम्पन्नताको एउटा प्रमुख सूचक त हो, तर यो मात्र होइन । आर्थिक अवस्थाको साथै अरु के–के समृद्धिका सूचक हुन सक्छन् भनेर स्थानीय स्तरबाटै त्यसको खोजविन गरी योजना तथा आयोजना सञ्चालन गर्नुपर्छ । समाजभित्रको आय, खर्च र सम्पत्तिको वितरणलाई सहीरुपमा बुझेर जनताको जीवनको गुणस्तर नाप्दा उनीहरुको राजनीतिमा सहभागिता रहनेले पनि भूमिका खेल्नुपर्छ ।

वडाको समृद्धि आकाशबाट बर्सिने होइन, व्यक्ति, परिवार अनि समाज विस्तारै सम्पन्न हुँदै जाँदा समृद्धि हुनेमा नरैनापुर गाउँपालिका वडा नं. ६ का वडाध्यक्ष प्रेमचन्द्र मौर्यको बुझाई छ । ‘सबैभन्दा सानो स्थानीय प्रशासनिक तह वडा नै भएकाले सबैभन्दा पहिले वडाबाटै समृद्धि आवश्यक छ,’ वडाध्यक्ष मौर्य भन्छन्, ‘वडा सबैभन्दा सानो स्थानीय प्रशासनीक ईकाई भएकाले यसको व्यवस्थापन गर्न त्यति गाह्रो हुँदैन । त्यसैले गाउँपालिकाको समृद्धिका लागि वडाको विकास महत्वपूर्ण छ ।’

वडाको विकास र समृद्धिका लागि नरैनापुर वडा नं. ६ ले पनि विभिन्न आयोजनाहरु सञ्चालनमा छन् । तीमध्ये कतिपय योजनाहरु सम्पन्न भइसकेका छन् भने कतिपय सम्पन्न हुने चरणमा रहेका छन् । योजना सञ्चालन तथा कार्यान्वयन गर्दा निर्वाहमुखी मात्रै नभई निर्यातमुखी स्तरको गर्दा आर्थिक उपार्जन हुने खालका योजना सञ्चालनमा ध्यान दिएको वडाध्यक्ष मौर्यको भनाई छ । उनका अनुसार पूर्वाधार विकासका कार्यक्रमहरु धेरै भएका छन् । वडाभित्र पिसिसि ढलान, ईट्टा सोलिङ, माटो ग्राभेल पटान लगायतका विकास भएका छन् ।

विकास निर्माण सम्बन्धी भएका कार्यहरु

१. सोनबर्षा गाउँभित्रको ३०० मिटर सडकमा इँट्टा सोइलिङ्ग ।
२. कोदरबेटवा गाउँभित्रको २५० मिटर सडकमा इँट्टा सोइलिङ्ग ।
३. दोन्द्रा गाउँभित्रको २५० मिटर सडकमा माटो पटान ।
४. जमुनी गाउँभित्रको सडकको दायाँबायाँ नाली निर्माण तथा गाब्रेल ।
५. कोहला गाउँभित्रको सबै सडकहरु पिसिसि निर्माण ।
६. गंगापुर, नयाँबस्ती र कोदरबेटवा नयाँवस्ती सडकमा माटो पटान तथा गाब्रेल ।
७. पतरकी गाउँको ८०० मिटर सडकमा माटो पटान ।
८. चौबिस विघाको ४५० मिटर सडकमा माटो पटान ।
९. भोजपुर नयाँवस्तीमा सडकमा माटो पटान ।
१०. कोहलामा चौतारी निर्माण ।
११. जगैनाथ मन्दीर निर्माण ।
१२. दुर्गा काली मन्दीर निर्माण ।
१३. कोहला खेल मैदान निर्माण ।
१४. वडाभित्र ३५ वटा स्मार्ट बाख्रापालन खोर निर्माण ।
१५. जयकिसान माविको कृषि प्राविभिक भवन निर्माण ।
१६. दुई तले आपतकालिन सेल्टर भवन निर्माण ।
१७. वडाभित्रका विभिन्न चोकका विद्युत पोलमा उज्यालोका ३०० वटा बत्ती जडान ।
१८. छाडा गाई पशु नियन्त्रणको लागि गौशाला निर्माण ।
१९. ६ नम्बर वडा कार्यालय परिसरमा गार्डेन तथा सवारी पार्किङ्ग निर्माण ।
२०. बाढीपीडितका लागि राहत तथा उद्दारका कार्यक्रमहरु सञ्चालन ।
२१. गरिब तथा असहायकहरुका लागि सुरक्षित आवास निर्माण ।
२२. आधुनिक कृषि तथा मौसमी र बेमौसमी तरकारी खेती गर्न दुई दिने तालिम तथा तरकारी खेतीका लागि बीउबीजन, विषादी र तरकारीका बेर्ना सिँचाइ गर्न हजारी वितरण ।
२३. व्यवसायीक पशुपालन गर्न दुई दिने पशु विकास तालिम तथा पशु औषधि वितरण ।
२४. वडाभित्रका ३० जना किशोरकिशोरीलाई कम्प्युटर तालिम प्रदान ।
२५. सन्तानेश्वर महादेव मन्दिर दर्शन गर्न जाने भक्तजनहरुलाई सहजताका लागि पहाडमा गोरेटो बाटो निर्माण तथा मर्मत ।
२६. जमुनी स्कुलभित्र वृक्षारोपण कार्यक्रम ।
२७. स–साना बालबालिकाको सिकाई र पढाईका लागि चौबिस विघामा गुरुकुल पाठशालाको स्थापना ।
२८. २०७९ असोज १८ देखि २१ गतेसम्म परेको अविरल बर्षाका कारण आएको बाढीबाट प्रभावितहरुको तथ्यांक संकलन गरी बाढीपीडितलाई रु.१५ हजारका दरले राहत स्वरुप नगद वितरण ।

धेरै गाउँटोलले घेरिएको वडा भएकाले विकास निर्माणमा एकदमै पछाडि परेको नरैनापुर गाउँपालिका वडा नं.६ मा अहिले विकासे योजनाका कामहरु तीव्ररुपमा अघि बढेका छन् । यहाँ दुई दर्जनभन्दा बढी विकास निर्माण सम्बन्धी कामहरु भएका छन् । यस वडामा कृषकहरु धेरै भएकोले उनीहरुलाई जोड्न विभिन्न कामहरु भएका छन् । सामाजिक विकासतर्फ धेरै कामहरु भएका छन् । बालबिवाह, लैङ्गिक हिंसा जस्तै थुप्रै सामाजिक समस्याहरुलाई न्यूनीकरण गर्दै वडाका जनप्रतिनिधि र कर्मचारी अघि बढेका वडाध्यक्ष मौर्यले बताए ।

नरैनापुर गाउँपालिका ६ नम्बर वडा समिति र जनताका माझबाट आएका योजनाहरुमार्फत विकास निर्माणका काम गरिरहेको छ । पूर्वाधार विकास, सामाजिक विकासका धेरै कामहरु उपभोक्ता समितिमार्फत भएका छन् । पहिले वडाभित्रका भौतिक पूर्वाधारहरुको अवस्थामा दयनीय थियो, अहिले रुप फेरिएको छ । भौतिक पूर्वाधारसँगै शिक्षा र स्वास्थ्यलाई प्रथामिकतामा राखेर कामहरु भइरहेका छन् । वडामा रहेका दुई वटा सामुदायिक विद्यालयको पूर्वाधार विकास र गुणस्तर सुधारमा लागिपरेको वडाध्यक्ष मौर्यको भनाई छ ।

गाउँमा सञ्चालन भइरहेका विकासे योजनामा जनप्रतिनिध र कर्मचारीहरु सक्रिय रुपमा लागेका छन् । गाउँमा विकासे कामको अनुगमनका साथै योजनाका काममा सक्रिय रुपमा लागिपरेको नरैनापुर गाउँपालिका वडा नं. ६ का वडा सचिव हरि बुढाले बताए । उनले वडामा बजेट कार्यान्वयनमा चासो लिएर गाउँको विकासका लागि जनप्रतिनिधिहरु सक्रिय भएको लाग्ने गरेको वडा सचिव बुढाले बताए । वडाध्यक्ष मौर्यले आफ्नै निगरानीमा विकास निर्माण काम भइरहँदा दिगो र दरिलो रुपमा सम्पन्न भएको दावी गरे ।