यात्रुको रूपमा सवार दुई पाइलट, जसले सम्हाले फ्लाई दुबईको कमाण्ड

तीन दिनअघि फ्लाई दुबाईको दुबई–तेल अभिव उडानमा भएको गम्भीर घटनाका क्रममा विमानमा यात्रुका रूपमा सवार दुई पाइलटले ककपिटमा पुगेर विमानको नियन्त्रण सम्हालेका थिए । उनीहरूको तत्कालको हस्तक्षेपले विमानमा सवार १८२ जनाको ज्यान जोगाउन महत्त्वपूर्ण भूमिका खेलेको बताइएको छ ।

उडानका क्रममा विमान अचानक तीव्र गतिमा तल झर्न थालेपछि ती दुई पाइलट ककपिटमा पुगेका थिए । उनीहरूले विमानलाई नियन्त्रणमा लिएर स्थिर अवस्थामा ल्याए र अन्ततः साउदी अरेबियाको ताबुकमा आपत्कालीन अवतरण गराएका थिए । यद्यपि, फ्लाई दुबाईले ती दुवै पाइलटको नाम तथा पहिचान सार्वजनिक गरेको छैन । एयरलाइन्सले उनीहरूलाई विमानमा रहेका अतिरिक्त चालक दलका सदस्यका रूपमा मात्र उल्लेख गरेको छ ।

‘डेडहेडिङ’ गरेर यात्रु बनेका थिए

विमानमा रहेका १८२ जनामध्ये ती दुई अफ–ड्युटी पाइलट पनि थिए । उनीहरू तेल अभिवबाट सोही विमान लिएर दुबई फर्कने तयारीमा रहेकाले यात्रुका रूपमा उडानमा सवार थिए । उड्डयन क्षेत्रमा ड्युटीमा नरहेका चालक दलका सदस्यले अर्को उडानका लागि यात्रुका रूपमा यात्रा गर्ने प्रक्रियालाई ‘डेडहेडिङ’ भनिन्छ । उनीहरू विमानमा रहेको कुरा अन्य यात्रुलाई थाहा थिएन ।

तर, उडानका क्रममा ककपिटमा गम्भीर घटना भएपछि उनीहरूले विमान नियन्त्रणमा लिन निर्णायक भूमिका खेले । उडानका क्रममा क्याप्टेन स्मित मछारमाथि ओमानका सह–पाइलटले धारिलो हतियारले आक्रमण गरेका थिए । घाइते मछारले सह–पाइलटको सामना गर्दै ककपिटको ढोका खोल्न सफल भएका थिए ।

यात्रुहरूका अनुसार, सह–पाइलटले मछारमाथि लगातार प्रहार गरेका थिए, जसका कारण ककपिटभित्र रगतसमेत फैलिएको थियो । ककपिटको ढोका खुलेपछि एक यात्रुले सह–पाइलटलाई नियन्त्रणमा लिन खोजेका थिए । अन्य यात्रुले पनि उनलाई समात्ने प्रयास गरेका थिए । त्यही क्रममा विमानमा सवार एक अफ–ड्युटी पाइलट ककपिटमा पुगे र विमानको नियन्त्रण सम्हाले । केही समयपछि दोस्रो अफ–ड्युटी पाइलट पनि ककपिटमा पुगे ।

करिब १० मिनेटमा विमान नियन्त्रणमा

विमानमा सवार यात्रु ड्यानियल स्लिक्टरले घटनाको विवरण सार्वजनिक गरेका छन् । उनका अनुसार, एक अतिरिक्त पाइलट यात्रुहरूका बीचबाट तीव्र गतिमा ककपिटतर्फ पुगेका थिए । उनी ककपिटभित्र पुग्दा केही यात्रु सह–पाइलटलाई नियन्त्रणमा लिने प्रयास गरिरहेका थिए । दुवै पाइलटले ककपिटको ढोका भित्रबाट बन्द गरेपछि विमानको नियन्त्रण सम्हालेका थिए ।

त्यतिबेला विमान तीव्र गतिमा तल झरिरहेको थियो भने रडरको एउटा भागसमेत क्षतिग्रस्त भएको बताइएको छ । स्लिक्टरका अनुसार विमानलाई स्थिर र नियन्त्रणमा ल्याउन ती पाइलटलाई करिब १० मिनेट वा त्यसभन्दा बढी समय लागेको थियो । यस क्रममा ककपिटबाट ‘मेडे’ आपतकालीन सन्देशसमेत प्रसारण गरिएको थियो ।

‘विमान अपहरण भयो कि भन्ने डर लाग्यो’

विमान स्थिर भएपछि पनि यात्रुहरूको त्रास तत्काल हटेन । ककपिट सम्हालेका दुई पाइलटले सुरुमा यात्रुसँग सम्पर्क नगरेकाले केही यात्रुलाई विमान अपहरण भएको आशंका भएको स्लिक्टरले बताएका छन् । विमानलाई इरानतर्फ लगिँदै छ कि भन्ने डरसमेत यात्रुमा उत्पन्न भएको थियो ।

करिब ४५ मिनेटपछि पाइलटहरूले यात्रुलाई विमान साउदी अरेबियाको ताबुकमा अवतरण गराइने जानकारी दिएका थिए । त्यसपछि मात्र यात्रुहरूले स्थिति नियन्त्रणमा रहेको महसुस गरेका थिए । घटनाका क्रममा विमान नियन्त्रणमा लिएर सुरक्षित अवतरण गराउन सहयोग गर्ने दुवै अफ–ड्युटी पाइलटको पहिचान भने फ्लाई दुबाईले हालसम्म सार्वजनिक गरेको छैन ।