सम्पत्ति विवादमा परी गृहमन्त्री पदबाट राजीनामा दिन बाध्य भएका सुधन गुरुङ छानबिन समितिको क्लिन चिटपछि पुनः गृहमन्त्रीमा नियुक्त हुने भएका छन् । आजै उनको सपथग्रहण हुने भएको छ ।
यसअघि सम्पत्तिलगायत विभिन्न विवादमा नाम तानिएपछि गुरुङले गृहमन्त्री पदबाट राजीनामा दिएका थिए । सरकारले उनीमाथि छानबिन गर्न एक समिति गठन गरेको थियो । उक्त समितिले क्लिन चिट प्रदान गरेपछि गुरुङलाई गृहमन्त्रालयमा फर्काउने निर्णय गरिएको हो ।
पूर्वन्यायाधीश अच्युतमप्रसाद भण्डारीको नेतृत्वमा गठित छानबिन समितिले गुरुङको सम्पत्तिमा विवाद गर्नुपर्ने कुनै आधार नरहेको निष्कर्ष निकालेको छ । समितिका अनुसार गुरुङसँग रहेको सुन पुख्र्याैली सम्पत्ति हो भने जग्गा खरिदमा देखिएको अनियमितता व्यक्तिगत नभई राज्यको प्रणालीगत कमजोरीको परिणाम रहेको उल्लेख गरिएको छ ।
महावीर पनि बन्दै मन्त्री
प्रधानमन्त्री बालेन शाहले प्रतिनिधिसभा सदस्य सुधन गुरुङसँगै महावीर पुनलाई मन्त्रीमा नियुक्त गर्नका लागि राष्ट्रपति रामचन्द्र पौडेलसमक्ष सिफारिस गरेका छन् । आज दिउँसो ३ बजे दुवैजनालाई नियुक्ति गरेर राष्ट्रपति निवास सितलनिवासमा शपथ ग्रहण गराउने कार्यक्रम रहेको जनाइएको छ ।
सुधन गुरुङ सम्पत्ति र सेयरको विषयमा विवादमा परेपछि राजीनामा दिएका थिए । त्यसपछि सरकारले बनाएको छानिबिन समितिले उनीमाथि अनुसन्धान गरेर मंगलबार नै सरकारले सो प्रतिवेदन ग्रहण गर्ने निर्णय गरेको छ । त्यस्तै, विज्ञान प्रविधि तथा नवप्रवर्तन मन्त्रीमा सो मन्त्रालय स्थापनाको माग गर्दै आएका स्वतन्त्र सांसद महावीर पुनलाई नै नियुक्त गर्ने निर्णय प्रधानमन्त्री शाहले लिएका छन् ।
