नेकपा (माओवादी केन्द्र), नेकपा (एकीकृत समाजवादी) लगायत आठ कम्युनिस्ट घटकहरूबीच एकता प्रक्रिया अघि बढेसँगै नयाँ पार्टीको चुनाव चिन्ह ‘तारा’ राख्ने निर्णय भएको छ । यो निर्णयपछि राष्ट्रियसभा सदस्य तथा वरिष्ठ कम्युनिस्ट नेता बामदेव गौतमले आफू सबैभन्दा बढी खुसी भएको बताएका छन् ।
हिजो (आइतबार) बसेको आठ घटकका शीर्ष नेताहरूको संयुक्त बैठकमा गौतमले आफ्नो खुसी व्यक्त गर्दै भने, ‘यो चिन्ह मैले नै चुनेको हुँ । घुम्दैफिर्दै तारा र मेरो फेरि भेट भयो । म अत्यन्त खुसी छु ।’ २०५४ सालमा नेकपा (एमाले) बाट अलग भएर गौतमको नेतृत्वमा गठन भएको नेपाल मजदुर किसान पार्टी (माले) को चुनाव चिन्ह तारा नै थियो ।
२०५६ को आम निर्वाचनमा मालेका उम्मेदवारहरूले यही चिन्ह प्रयोग गरेका थिए । पछि गौतमले माले पार्टीलाई एमालेमै विलय गरेका थिए । तर, सीपी मैनालीसहित केही नेताहरू एमाले फर्किएनन् र उनीहरूले तारा चिन्ह जोगाएर राखेका थिए । अब त्यही चिन्ह नयाँ एकीकृत पार्टीले प्रयोग गर्ने भएको हो ।
संयोगवश, गौतम केही समयअघि मात्र नेकपा (एकीकृत समाजवादी) मा प्रवेश गरेका छन् । बैठकमा उनले भने, ‘मैले चुनेको चिन्ह पनि छोडेको थिएँ । फेरि यो चिन्हसँग मेरो भेट भयो ।’ नयाँ पार्टीको नाम भने अझै टुंगो लागेको छैन । नेकपा (समाजवादी), नेपाली कम्युनिस्ट पार्टी वा नेपाली कम्युनिस्ट पार्टी (समाजवादी) राख्ने विषयमा छलफल भइरहेको नेताहरूले बताएका छन् ।
