नेपाल कम्युनिस्ट पार्टी (माओवादी केन्द्र) जिल्ला समन्वय समिति बाँकेले जिल्लामा रहेका आठ वटा पालिकामा एकैपटक पार्टीको अधिवेशन सम्पन्न गर्ने भएको छ । माओवादी केन्द्र बाँकेले जिल्लाका सबै पालिकामा एउटै मितिमा पालिका अधिवेशन गर्न लागिएको जनाएको हो । माओवादी केन्द्र बाँकेका संयोजक नरेन्द्र पाण्डे ‘जेम्स’ले जिल्लाका सबै पालिकामा आगामी मङ्सिर २९ र ३० गते एकैपटक पालिका अधिवेशन सम्पन्न गर्न लागिएको जानकारी दिए ।

बाँकेका ८१ वटा वडामध्ये हालसम्म ७५ वटा वडाको अधिवेशन सम्पन्न गरिसकेको पनि उनले जानकारी दिए । ‘बाँकी रहेका वडाहरूमा मङ्सिर १२ गतेसम्म अधिवेशन सम्पन्न गर्दछौँ,’ संयोजक पाण्डेले भने, ‘सबै वडाको अधिवेशन सकिएपछि आगामी मङ्सिर २९ र ३० गते सबै पालिकामा एकैपटक पालिका अधिवेशन गर्ने योजना बनाएका छौँ ।’

उनका अनुसार पालिका सम्मेलन सफल बनाउनका लागि खजुरामा केन्द्रीय सदस्य आइपी खरेल र लुम्बिनी प्रदेश सदस्य डम्बरबहादुर बिक ‘तुफान’, डुडुवामा केन्द्रीय सल्लाहकार प्रकाश सुवेदी ‘चन्द्रकान्त’ र लुम्बिनी प्रदेश सचिवालय सदस्य गेहराज रिजाल ‘नवीन शर्मा’, बैजनाथमा जिल्ला इन्चार्ज पूर्णा सुवेदी, नरैनापुरमा केन्द्रीय सदस्य नरेन्द्र न्यौपाने, जानकीमा केन्द्रीय सदस्य अञ्जना थारु, कोहलपुरमा केन्द्रीय सदस्य उषा पुन र जिल्ला संयोजक नरेन्द्र पाण्डे, राप्तीसोनारीमा केन्द्रीय सदस्य कृष्णा केसी ‘नमुना’ र पट्टु थारु, नेपालगन्जमा प्रदेश सहसचिव अकलबहादुर बम र जिल्ला सचिव डिल्ली बराललाई जिम्मेवारी दिइएको छ ।

जिल्लामा रहेका पार्टी केन्द्रीय सदस्य, प्रदेश सदस्य, जिल्ला समन्वय समिति सदस्य, प्रदेश सल्लाहकार, प्रदेश परिषद् सदस्यहरूलाई आआफ्नो जिम्मेवारीसहित कार्य विभाजन प्रदान गरिएको छ । व्यापक जनपरिचालनसहित व्यापक पार्टी सदस्यहरूको सहभागितामा पालिका अधिवेशन सम्पन्न गरिने संयोजक पाण्डेले बताए ।

माओवादी केन्द्रका बाँके इन्चार्ज पूर्णा सुवेदीले पार्टीको विधि विधान अनुसार सबै पालिकाका अधिवेशन सम्पन्न हुने बताइन् । उनले वडा भेलाबाट प्रतिनिधि छनौट हुने र आन्तरिक प्रतिस्पर्धाबाटै अधिवेशन सम्पन्न हुने बताइन् । ‘सकेसम्म सर्वसम्मतिबाटै पदाधिकारी तथा सदस्य छनौट हुनेछन्, कारणवश त्यसो हुन नसके निर्वाचन प्रक्रियाबाट समेत नेतृत्व चयन हुन्छ,’ उनले भनिन्, ‘कुनै नेताको दबाब र टीका लगाएर कुनै पनि नेतृत्व चयन हुने छैनन् ।’

माओवादी केन्द्र बाँकेका अनुसार पार्टी सदस्यताको नवीकरणलाई पनि तीव्रता दिइएको छ । हालसम्म जिल्लामा करिब छ हजार पार्टी सदस्यको सदस्यता नवीकरण भइसकेको छ । मङ्सिर १५ गतेसम्म सबै सदस्यहरूको अभिलेखीकरण गरिसक्ने र कार्ययोजना अनुसार मङ्सिर २५ गतेसम्म सबै पालिकाको अधिवेशन प्रतिनिधि छनौट गरिसक्ने नेकपा माओवादी केन्द्र बाँकेले जनाएको छ ।