रास्वपाका सभापति रवि लामिछानेसँग रुपन्देही प्रहरीले आज पनि बयान लिइँदैछ । मंगलबार रुपन्देही ल्याइएका लामिछानेसँग बुधबार साढे ८ घण्टा लामो बयान लिइएको थियो । तर, बयान नसकिएकाले आज बिहान १० बजेदेखि फेरि बयान लिने प्रहरीले जनाएको छ ।

मंगलबार र बुधबार गरी उनीसँग १३ घण्टा लामो बयान लिइएको थियो । गोर्खा मिडिया नेटवर्क मार्फत सुप्रिम सहकारीको रकम अपचलन गरेको सम्बन्धमा जिल्ला सरकारी वकिलको कार्यालय रुपन्देहीमा उनको बयान लिइएको हो ।

जिल्ला सरकारी वकिलको कार्यालय रुपन्देहीका प्रमुख प्रेमराज पौडेल, इलाका प्रहरी कार्यालय बुटवलका प्रमुख डिएसपी विजयराज पण्डितसहित अनुसन्धान अधिकृतहरूले लामिछानेको बयान लिएका हुन् । लामिछानेको बयान सम्भवतः आज सकिने प्रहरीको भनाइ छ ।

लामिछानेले मंगलबारको बयानमा जस्तै बुधबार पनि इनकारी बयान दिएको हुन् । जिल्ला सरकारी वकिलको कार्यालय भैरहवामा बयान चलिरहँदा सडकमा रास्वपाका नेता कार्यकर्ताहरूले आन्दोलन गरिरहेका थिए ।

भैरहवास्थित बर्मेली टोलमा रास्वपाका नेता कार्यकर्ताहरूले राष्ट्रिय झण्डासहित प्लेकार्ड बोकेर नाराबाजी गरेका थिए । उनीहरूले राजनीति प्रतिशोधकै लागि निर्दोष व्यक्तिलाई थुन्न नपाइने भन्दै लामिछानेको रिहाइको माग गरेका हुन् ।

लामिछाने गोर्खा मिडियाका तत्कालीन प्रबन्ध निर्देशक हुन् । उनी पदमा रहेकै बेला सुप्रिम सहकारीबाट ठुलो रकम गोर्खा मिडिया नेटवर्कमा गएको देखिएको छ । यसअघि भएका अनुसन्धान प्रतिवेदन अनुसार सुप्रिम सहकारीबाट गोर्खा मिडिया नेटवर्कमा १४ करोड २९ लाख रुपैयाँ गैरकानुनी रुपमा गएको छ ।

त्यसमध्ये २ करोड लामिछानेको नाममा निकालिएको यसअघिका अनुसन्धान प्रतिवेदनमा औँल्याइएको छ । बुटवलको राजमार्ग चौराहमा केन्द्रीय कार्यालय रहेको सुप्रिम सहकारीमा १० हजार ३९१ बचतकर्ता छन् ।

ती बचतकर्ताले जम्मा गरेको १ अर्ब ७ करोड मध्ये ८६ करोड १८ लाख रकम जीवी राईको समूहले अपचलन गरेको भन्दै सहकारीका १ हजार ८३१ बचतकर्ताले इलाका प्रहरी कार्यालय बुटवलमा उजुरी दिएका छन् । तीनै उजुरीका आधारमा करिब ९ महिना अघिदेखि सुप्रिम सहकारी ठगी प्रकरणमा अनुसन्धान जारी छ ।

अनुसन्धानकै क्रममा प्रहरीले गत वैशाखमा सहकारीका संरक्षक तथा गोर्खा मिडिया नेटवर्कका अध्यक्ष जीवी राई, सहकारीका अध्यक्ष ओमप्रकाश गुरुङ, सचिव दिपेश पुन, सहकारीका व्यवस्थापक सागर केशी लगायतका २८ जनाविरुद्ध सरकारी वकिलको कार्यालय मार्फत मुद्दा दायर गरेको थियो ।

तीमध्ये सात जना वैशाखमै पक्राउ परेका थिए । अध्यक्ष गुरुङलाई पुर्पक्षका लागि थुनामा पठाइएको छ । सचिव पुन सहितका ६ जना धरौटीमा रिहा भए । जीवी सहितका १९ जना अहिले पनि फरार छन् । फरार १९ जना विरुद्ध जिल्ला अदालतले गत वैशाखमै पक्राउ पुर्जी गरी गरेको थियो ।

अनुसन्धानकै क्रममा गोर्खा मिडिया नेटवर्क प्रालिका संचालक, पदाधिकारी तथा सदस्यहरूको नाममा सुप्रिमबाट पैसा झिकेर गोर्खा मिडिया खर्च गरेको देखिएपछि रवि लामिछाने, पूर्व डिआइजी छविलाल जोशी लगायतका १२ जनाविरुद्ध पनि जिल्ला अदालत रुपन्देहीले कात्तिक ८ मा पक्राउ पुर्जी जारी गरेको थियो ।

सोही मुद्दामा गोर्खा मिडियाका उपाध्यक्ष रहेका पूर्व डिआइजी छविलाल जोशीलाई यसअघि नै रुपन्देहीमा बयान गरेर पोखरा पठाइएको छ । पूर्व गृहमन्त्री समेत रहेका लामिछानेलाई भने मंगलबार भैरहवा ल्याएर बयान लिन सुरु गरिएको हो ।