सूचनाको शक्ति - The Power Of Information

        

बाँकेमा ३१ हजार १५९ सवारीसाधन कारबाहीमा, दुई करोड ४४ लाख जरिवाना

जिल्लामा भएका विभिन्न सवारी साधन दुर्घटनाबाट ६३ जनाले ज्यान गुमाएका छन् ।

बाँकेमा चालु आर्थिक वर्ष २०८०–०८१ को असार पहिलो सातासम्म ३१ हजार १५९ सवारी र ढुवानीका साधनलाई कारबाही गरिएको छ । ती सवारी साधनलाई कारबाही गरेर दुई करोड ४४ लाख २७ हजार रुपैयाँ जरिवाना राजस्व सङ्कलनसमेत गरिएको जिल्ला ट्राफिक प्रहरी कार्यालय बाँकेले जनाएको छ ।

दैनिकजसो ट्राफिक नियम सम्बन्धी जानकारी दिँदै आए पनि जिल्लामा ३१ हजार १५९ सवारी साधनले नियम विपरीत गाडी चलाएको पाइएकोले उनीहरूलाई कारबाही गरेर दुई करोड ४४ लाख २७ हजार रुपैयाँ जरिवाना समेत असुल गरिएको जिल्ला ट्राफिक प्रहरी कार्यालय बाँकेका प्रमुख गोपीकृष्ण सुवेदीले बताए ।

ट्राफिक प्रहरी कार्यालय बाँकेका प्रमुख सुवेदीका अनुसार लामो दुरीको यात्रामा दुई जना चालक नराख्ने ११० सवारी साधनलाई कारबाही गरेर एक लाख १० हजार राजस्व सङ्कलन भएको छ । यो वर्षमा ट्राफिक नियम उलङ्घन गर्ने धेरै सवारी साधनलाई गरिएको कारबाहीका कारण दुर्घटनामा केही कमी भएको बाँके ट्राफिक कार्यालयले जनाएको छ ।

कार्यालयका अनुसार जथाभावी पार्किङ, सवारी मोड्ने, ढाका खुल्ला राख्ने, एकतर्फी बाटोमा सवारी प्रवेश गराउने, हर्न बजाउने, लेन अनुशासन पालन नगर्ने लगायतका सवारी चालकलाई कारबाही गरिएको छ । त्यस्तै बाँकेको ट्राफिक व्यवस्थापनलाई सहज, व्यवस्थित र चुस्त बनाउन प्रविधिमैत्री ट्राफिक व्यवस्थापनमा प्राथमिकता दिइएको प्रमुख सुवेदीले बताए ।

सोही प्रकारले चालकको लापरबाही र सर्वसाधारणले सडक अनुशासन पालना नगर्दा मानिसको ज्यान जाने हुँदा ट्राफिक नियम कडाइ र जानकारीको लागि दुई हजार ३२६ पटक एक लाख २० हजार ३६५ जना व्यक्ति र जिल्लाका विभिन्न स्थानमा सचेतनामूलक कार्यक्रम गरिएको ट्राफिक प्रहरी प्रमुख सुवेदीले बताए ।

जिल्लामा विभिन्न सवारी साधन दुर्घटनाबाट ६३ जनाले ज्यान गुमाएको ट्राफिक प्रहरी कार्यालयले जनाएको छ । सडक दुर्घटना हुनेमा सबैभन्दा बढी मोटरसाइकल ११२, ट्रक १८, टिप्पर ४, बस १३, माइक्रो ४, जिप कार १७, ट्याक्टर ८, टेम्पो १२, र अन्य २२ गरेर २१० रहेको ट्राफिक प्रहरी कार्यालय बाँकेका प्रमुख सुवेदीले जानकारी दिए ।

ती दुर्घटनामा सबैभन्दा बढी पुरुष ४५ जनाको मृत्यु भएको छ भने महिला १६, बालक दुई गरी ६३ जनाको मुत्यु भएको ट्राफिक प्रहरी कार्यालयको तथ्याङ्कमा उल्लेख छ । अवधिमा सवारी दुर्घटनामा १०२ गम्भीर घाइते भएका छन् भने ९९ साधारण घाइते भएका छन् । यो अवधिमा सवारी दुर्घटनामा १० पशुचौपाया मरेका छन् भने ३ घाइते भएको तथ्याङ्कमा उल्लेख छ ।

ट्राफिक प्रहरीले नियम मिच्दा दुर्घटनाको जोखिम हुने भएकाले नियमसम्मत रूपमा सवारी साधन सञ्चालन गर्न पनि अनुरोध गरेको छ । ट्राफिक प्रहरी कार्यालय बाँकेका अनुसार नेपालगन्ज–सुर्खेत सडकखण्ड, पूर्व पश्चिम राजमार्गको ढकेरी–शम्शेरगन्ज सडकखण्ड र नेपालगन्ज–गुलरिया सडकखण्डमा बढी दुर्घटनाहरू हुने गरेको पाइएको छ ।

प्रकाशित मिति : १९ असार २०८१, बुधबार ०६:५९

लोकप्रिय