नेकपा एकता राष्ट्रिय अभियानका संयोजक वामदेव गौतम नयाँ सत्ता समीकरणमा मिसिएका छन् । राष्ट्रियसभा अध्यक्षको निर्वाचनमा गौतमले सत्तारुढ दलका उम्मेदवार नारायण दाहालको पक्षमा मतदान गरेका हुन् ।

नेकपा विघटन हुँदा पूर्व गृहमन्त्री गौतम माधव–प्रचण्ड समूहमा थिए । सर्वोच्चले नेकपा नाम जुधेको भन्दै नयाँ नाम लिएर आउन आदेश दिएपछि एमाले र माओवादी केन्द्रले पुरानै समितिमार्फत आ–आफ्ना गतिविधिमा सक्रिय भएका थिए ।

तत्कालीन प्रधानमन्त्री शेरबहादुर देउवाले दल फुटाउन अध्यादेश ल्याएपछि माधवकुमार नेपालले एमालेलाई फुटाएर एकीकृत समाजवादी बनाए । राष्ट्रियसभाका सांसद समेत रहेका गौतमले नेकपा विभाजित भएपछि वाम एकताका लागि छुट्टै अभियान संचालन गर्दै आएका छन् । तर, पछिल्लो समयमा उनले पार्टीका गतिविधि सक्रिय रुपमा अगाडि बढाउन सकेका छैनन् ।