करिब १४ किलोग्राम सुनको पाता शरीरमा टाँसेर दुबईबाट आएका गोरखाका चन्द्र घलेलाई त्रिभुवन अन्तर्राष्ट्रिय विमानस्थलमा आइपुगेलगत्तै अस्ति राति नियन्त्रणमा लिइयो । फ्लाई दुबईको उडान नम्बर एफजेड ५७३ मा काठमाडौं आएका घलेलाई विमानभित्रैबाट नियन्त्रणमा लिइएको थियो ।

पीए ०१४५४८८ नम्बरको राहदानी बोकेका घले सुनका पाता शरीरमा राखेर ल्याएको सूचनाको आधारमा पक्राउ परेका हुन् । विमानका अन्य यात्रु ओर्लेपछि अन्तिममा उनलाई नियन्त्रणमा लिइएको थियो । बुधबार राति काठमाडौं आउने टिकट रद्ध गरेर चन्द्र भोलिपल्टको उडानमा राति आइपुगेका थिए ।

प्रहरी र भन्सारको प्रारम्भिक अनुसन्धानबाट उनी पछिल्लो पाँच वर्षमा ६० पटक भिजिट भिसामा युएई जाउआउ गरेको पाइएको छ । उनी औसतमा महिनाको एक पटक दुबई र अबुधाबी पुगेर तीनदेखि पाँच दिनसम्म बसेपछि काठमाडौं फर्कने गरेको विवरण अध्यागमनको अभिलेखबाट फेला परेको हो । यसबाट उनी सुन तस्करीमा संलग्न भएको स्वतः पुष्टि भएको बताइन्छ ।

स्रोत भन्छ, ‘प्रत्येक पटक आउँदा उनले ज्याकेटभित्र लुकाएर यसैगरी किलोको किलो सुन ल्याउने गरेको संकेत मिलेको छ । काठमाडौंमा अवतरण गरेपछि विमानभित्रैको शौचालयमा सुन फाल्ने गरेको तथ्य पनि खुलेको छ । त्यसका लागि यात्रुमध्ये उनी अन्तिममा ओर्लने गरेका थिए । बिहीबार राति पनि उनी अन्तिममा ओर्लेका हुन् । चन्द्र प्रायः रातिको उडानमा काठमाडौं आइपुग्ने गरेको पाइन्छ ।’

यी सबै घटनाक्रमले कसले ल्याउने गरेको सुनको निम्ति चन्द्र भरिया बने ? भन्ने प्रश्न उठेको छ । विगतमा ५९ पटक उनी र उनको गिरोह सफल भएपनि यस पटक फन्दामा परेका हुन् । यसको निम्ति धेरैले प्रहरीको गाडी र प्रहरीमाथि नै आंशका गरेका छन् । केही समय अघिसम्म प्रहरीको गाडी विमानसम्मै पुग्थ्यो । हाल त्यसरी प्रहरीको गाडी विमानसम्म जानबाट रोकिएको छ ।

सम्भवतः विमानको शौचालयमा फयाँकिएको किलोको किलो सुन सरसफाई कर्मचारी, प्रहरीको मिलेमतोमा विमानस्थलबाट बाहिर ल्याउने गरिएको आशंकाको नजिक सबैजसो पुगेका छन् । सोही आशंकाका कारण प्रहरी महानिरीक्षकलगायत उच्च अधिकारीहरुको मथिंगल घुमेको बताइन्छ । दुबईबाट आएका गोरखाका चन्द्र घलेलाई राति त्रिभुवन अन्तर्राष्ट्रिय विमानस्थलमा सुनसहित नियन्त्रणमा लिएपछि सोधपुछको निम्ति धुम्बाराहीमा रहेका मीनबहादुर घलेलाई प्रहरीले पक्रेको थियो ।

बरामद सुनबारे घलेलाई रातिदेखि नै भन्सार कार्यालयमा राखेर अनुसन्धान गर्ने क्रममा २ बजे मीनबहादुर पक्राउ परेका थिए । गोरखाका घलेलाई राति साढे ४ बजे विमानस्थल भन्सार कार्यालय पुर्याइएको थियो । त्यसपछि साढे ४ बजे चन्द्रलाई प्रहरी वृत्त गौशाला र मीनबहादुरलाई कोटेश्वर प्रहरीमा राखेर छुट्टाछुट्टै बयान लिँदा सुन काण्डको रहस्य खुल्दै गएको हो ।