कोहलपुर नगरपालिकाको साढे चार बर्षे उपलब्धी
कोहलपुर नगरपालिका ‘कर्मचारी भर्ती केन्द्र र भ्रष्टचारको अखडा’
बाँके । सधैं विवादमा आइरहने बाँकेको कोहलपुर नगरपालिकाका स्थानीय तहको निर्वाचनका साढे चार बर्षमा कर्मचारीको भर्ती केन्द्र बनेको छ । केही जनप्रतिनिधि र कर्मचारीहरुको ‘भ्रष्टचारको अखडा’ बनेको कोहलपुर नगरपालिकामा साढे चार बर्षको अवधिमा ११७ जना कर्मचारी भर्ती गरिएको छ ।
निर्वाचित जनप्रतिनिधिहरुले आफ्ना आफ्न्त, नातागोता, नजिकका कार्यकर्ता भर्ती केन्द्रको रुपमा कोहलपुर नगरपालिकालाई विकास गर्दैै लगेका छन् । हाल २४२ कर्मचारी रहेको कोहलपुर नगरपालिकामा स्थायी कर्मचारी ११८ जना, करार कर्मचारी १०७ जना, अस्थायी १ जना रहेका छन् भने ज्यालदारी कर्मचारीका रुपमा ९ जनालाई भर्ती गरिएको छ ।
यी बाहेक सेवा प्रदायक संस्थामार्फत कोहलपुर नगर प्रहरीका नाममा सेक्युरीटि गार्ड कम्पनीबाट ७ जनालाई राखिएको छ । यस्तै एक गैरसरकारी संस्थासँग सम्झौता गरेर १६ जना कर्मचारी हेल्प डेक्सका नाममा कर्मचारी राखिएको छ । यसरी कर्मचारी भर्ती केन्द्रको अखडा बनेको कोहलपुर नगरपालिकामा कार्यालय सहयोगी मात्रै ५० जना रहेका छन् ।
नगरपालिकाको आर्थिक वर्ष २०७८/०७९ को बार्षिक नीति, बजेट तथा कार्यक्रम पुस्तकमा भएको तथ्यांक अनुसार कोहलपुरमा कुनै ठाँउमा त्यस्तो फुलबारी रहेको देखिँदैन, तर नगरपालिकाले आफन्त भर्नाको नाममा २ जना मालीसमेत राखेको छ । मापदण्ड विपरित कर्मचारी भर्ना गर्ने तर खर्च अर्कै बाटोबाट गर्ने कोहलपुर नमुना नगरपालिका बनेको छ ।
कोहलपुर–नेपालगन्ज सडक खण्ड कोहलपुर चौराहादेखि बाबानगरसम्म सरसफाई गर्न नगरपालिकाको वातावरण शाखाले ५ जनालाई करिव ४५ दिनसम्म दैनिक ५७७ रुपैयाँका दरले दैनिक ज्यालादारीमा काममा लगाएको शाखा प्रमुख पुरुषोत्तम पोखरेलले वताए । यस्तै नगरपालिकाले ५ जना कुचिकार, १ जना स्वीपर पनि राखेको तथ्यांक छ ।
यता कोहलपुर बजारमा सरसफाई गरेवापत प्रतिसटर मासिक १५० देखि १५०० सम्म जटायू रिसाईकल्स प्रालिलाई दिने गरेको व्यापारीहरुले बताउँछन् । कोहलपुर नगरपालिकाले मेलमिलाप संयोजक २ जना, समाजिक परिचालक २ जना जनही मासिक २२ हजार ५०० रुपैयाँका दरले तलब दिँदै आएको पनि उक्त पुस्तकमा देखिन्त्छ ।
यसरी नगरपालिकालाई कर्मचारी भर्ती केन्द्रको अखडा बनाएर जनताले तिरेको करको चरम दुरुपयोग गरिरहेको पनि पुस्तकमा देखिन्छ । कोहलपुर नगरपालिकामा प्रमुख प्रशासकीय अधिकृतहरु पटक–पटक सरुवा हुनुको मुख्य कारण कर्मचारी भर्ना पनि भएको नगरपालिका श्रोतको दाबी छ । नगरपालिकाले विभिन्न बहानामा सार्वजनिक सुनुवाई समेत गरेको छैन ।
कोहलपुर नगरपालिकाले चार वर्षसम्म लेखा समितिसम्म नबनाएर समय बिताएको देखिन्छ । नगरपालिकाले नगर प्रमुख तथा उपप्रमुखका स्वकीय सचिव, प्रेस सल्लाहकार र कानूनी सल्लाहकार नियूक्ति गैरकानूनी रुपमा राखेको महालेखा परिक्षकको प्रतिवेदन देखाएको छ । महालेखाको प्रतिवेदनले उनीहरुलाई भुक्तानी गरिएको तलव भत्ता बेरुजुमा देखाएको छ ।
महालेखाले बेरुजु देखाएको उक्त रकम हालसम्म नगरपालिकाले असुल उपरसमेत गरेको देखिँदैन । नेपालकै उत्कृष्ट नगरपालिका बनाउने नारा जप्दै आएका कोहलपुरका जनप्रतिनिधिहरुले आफैले परिकल्पना गरेको ‘हरित संगमस्थल हाम्रो शहर, सुन्दर र समृद्ध कोहलपुर नगर’ नाराकै बदनाम गरिरहेका छन् ।
नगरपालिकाका केही भ्रष्ट जनप्रतिनिधि र कर्मचारीकै कारण काम गर्ने वातावरण नरहेको र सरकारी कर्मचारी विधीअनुसार चल्नुपर्ने भए पनि जनप्रतिनिधिले आफू अनुकुल चलाउन खोज्दा समस्या हुने गरेको केही कर्मचारीहरु बताउँछन् । नगरपालिकाका केही जनप्रतिनिधि र कर्मचारीको ‘कमाउधन्दा चलाउने अड्डा’ बनेको छ ।
त्यसो त अख्तियार दुरुपयोग अनुसन्धान आयोगमा कोहलपुर नगरपालिकाका एक दर्जनभन्दा बढी मुद्दाहरु परेका छन् । कोहलपुर नगरपालिकामा केही ठुला योजनाहरु मापदण्ड विपरित सञ्चालन हुँदै आएका छन् । नगरपालिकामा हुने चरम अनियमिता रोक्न खोज्न खोज्दा प्रमुख प्रशासकीय अधिकृत कोहलपुरमा टिक्न सक्दैनन् ।
अनियमितता रोक्न खोज्दा नगरपालिकामा आएको पाँच महिनामै प्रमुख प्रशासकीय अधिकृत टोपेन्द्र केसीको सरुवा भएको थियो । केही जनप्रतिनिधि र कर्मचारीहरुको ‘भ्रष्टचार’को अखडा बनेको कोहलपुर नगरपालिकामा जनप्रतिनिधि आएको साढे चार वर्षमा नौं जना प्रमुख प्रशासकीय अधिकृत फेरिएका छन् ।
कोहलपुर नगरपालिकाका मेयरसँग नजिक बन्दै ‘आसेपासे’हरुले ‘हाकिम’लाई अनावश्यक कार्य गर्न दबाव दिँदै चरम आर्थिक घोटालामा लिप्त हुने गरेको पनि यसअघिका प्रमुख प्रशासकीय अधिकृतहरु बताउँछन् । केही जनप्रतिनिधि र कर्मचारीहरुको मिलेमतोमा अर्थहीन योजनामा बजेट खर्च सरकारी ढुकुटीमाथि ब्रह्मालुट भइरहेको छ ।
कोहलपुरमा चाकडी, चाप्लुसी गर्नेहरुको हालिमुहाली भएकाले कोहलपुरको दिगो विकास हुन नसकेको कोहलपुरबासीहरु बताउँछन् । कोहलपुर नगरपालिकाको अर्को मुख्य समस्या भनेको विभिन्न विषयगत शाखामा करोडौं रकम विनियोजन गर्ने र आफु अनुकुलका संघसंस्था, व्यक्ति फर्मलाई बर्षेनि मोटो रकम दिएर भ्रष्टाचार गर्दै आएको पनि नगरपालिका स्रोत बताउँछ ।
।