रसुवाको भोटेकोशी नदीमा बुधबार आएको बाढीबाट प्रभावित क्षेत्रमा सञ्चार सुविधा पुनःस्थापना गर्ने कार्यमा दूरसञ्चार सेवाप्रदायकले तीव्रता दिएका छन् ।
बाढीबाट मुख्य रूपमा प्रभावित रसुवा, नुवाकोट र धादिङका विभिन्न स्थानमा क्षतिग्रस्त टेलिकम टावर पुनः सञ्चालनदेखि फाइबर मर्मतलाई सेवाप्रदायकले प्राथमिकतामा राखेर काम गरिरहेको जनाएका छन् ।
नेपाल टेलिकमले बिहीबार नै हेलिकोप्टरबाट कर्मचारी परिचालन गरेर रसुवा सदरमुकाम धुन्चेमा मोबाइल स्टेसन सञ्चालनमा ल्याएको छ । शुक्रबार पनि कम्पनीका प्राविधिक प्रभावित क्षेत्रमा पुगेर सेवा सञ्चालन हुन बाँकी स्थानमा काम गरिरहेको टेलिकमले जनाएको छ ।
रसुवामा बाढीका कारण बन्द भएको गोसाइँकुण्ड गाउँपालिका–५ स्थित गोलजुङ टावर (बाहुनडाँडा) सञ्चालनमा ल्याई स्याफ्रुबेँसी, पार्वतीकुण्ड गाउँपालिका–४ र ५ तथा गोसाइँकुण्ड गाउँपालिका–३ र ५ तथा स्याफ्रुबेँसी–टिम्मुरे सडकखण्डका केही भागमा सेवा सुचारु भएको छ ।
त्यस्तै नुवाकोटको सूर्यगढी गाउँपालिका–३ मा अवस्थित गेर्खु मोबाइल टावर सञ्चालनमा ल्याएर विदुर नगरपालिका–१० र ११ तथा सूर्यगढी गाउँपालिका–४ का केही भागमा दूरसञ्चार सेवा सुचारु भएको टेलिकमले जनाएको छ ।
विदुर नगरपालिका–८ मा अवस्थित तुप्चे टावर तथा गोसाइँकुण्ड गाउँपालिका–२, टिमुरेमाथिको डाँडामा अवस्थित टेलिकम टावरमा हेलिकोप्टरबाट जेनेरेटर, पेट्रोल तथा प्राविधिक खटाई सेवा सुचारु गर्ने काम भइरहेको पनि कम्पनीले जानकारी दिएको छ ।
टेलिकमका अनुसार अहिलेसम्म तीन वटा जिल्लाका प्रभावित १२० साइटमध्ये ८० साइटमा सेवा सुचारु भइसकेको छ । निजी क्षेत्रको दूरसञ्चार सेवाप्रदायक एनसेलले पनि बाढीका कारण प्रभावित तीन वटै जिल्लाका प्रभावित कुल २७ साइटमध्ये बिहीबार रसुवाका तीन, नुवाकोटका आठ र धादिङका तीन गरी १४ साइट पुनः सञ्चालनमा ल्याएको जनाएको छ ।
शुक्रबार पनि थप पाँच वटा टावर सञ्चालनमा आएको कम्पनीले जनाएको छ । बाढीका कारण करिब ७०–८० किलोमिटर क्षेत्रमा फाइबर लिङ्कमा समस्या आएपछि एनसेलका २७ वटा मोबाइल टावर प्रभावित भएर सेवामा असर परेको थियो ।
कम्पनीले सम्भव भएका ठाउँमा क्षतिग्रस्त फाइबर मर्मत गरेर र कतिपय ठाउँमा पुराना माइक्रोवेभ लिङ्क प्रयोग गरेर नेटवर्क पुनः सञ्चालन ल्याएको उल्लेख गरेको छ । एनसेलले आफ्ना प्राविधिक टोलीलाई हवाई तथा सडकमार्गमार्फत परिचालन गरेको जनाएको छ । एनसेलले प्रभावित क्षेत्रमा थप तीनदेखि सात दिनका लागि निःशुल्क डेटा र भ्वाइससेवा उपलब्ध गराउने जानकारी पनि दिएको छ ।
