सत्यपाटी
बाँकेमा असार १२ गतेसम्म शून्य दशमलव पाँच प्रतिशत मात्रै धान रोपाइँ भएकोमा एक सातापछि असार १९ गतेसम्म १८ प्रतिशत पुगेको छ । कृषि ज्ञान केन्द्र बाँकेका अनुसार जिल्लामा आकाशे वर्षा भएपछि धान रोपाइँमा वृद्धि भएको हो ।
कृषि ज्ञान केन्द्रले शुक्रबारसम्म जिल्लामा छ हजार ८०.४ हेक्टर अर्थात् कुल धान रोपाइँ हुने क्षेत्रको १८ प्रतिशत भूभागमा रोपाइँ सकिएको जनाएको छ । केन्द्रका प्रमुख डा.विनोद घिमिरेले आकाशे वर्षा भएका कारण एक सातामा धान रोपाइँको दर बढेको जानकारी दिए ।
कार्यालयको तथ्याङ्क अनुसार असार १२ गतेसम्म जिल्लामा न्यून क्षेत्रफलमा मात्रै रोपाइँ भएको थियो । कार्यालय प्रमुख घिमिरेले भने, ‘पर्याप्त वर्षा भएपछि जिल्लाभर धान रोपाइँ भइरहेको छ ।’ उनका अनुसार सिक्टा सिँचाइ आयोजनाको मूल तथा शाखा नहर आसपासका क्षेत्रमा बढी रोपाइँ भएको छ ।
नेपालगन्ज उपमहानगरपालिका, डुडुवा र नरैनापुर गाउँपालिकामा भने अहिले पनि रोपाइँ अन्यत्रको तुलनामा कम छ । बाँकेमा कुल ५५ हजार ८२६ हेक्टर क्षेत्रफलमा खेती हुने गरेकोमा ३३ हजार ७८० हेक्टरमा धान रोपाइँ हुने गर्दछ । यस वर्ष ढिलो गरी वर्षा सुरु भएका कारण रोपाइँ केही ढिलो भए पनि यहाँको रैथाने चलन अनुसार यो अवस्था सन्तोषजनक रहेको कृषि ज्ञान केन्द्रले जनाएको छ ।
बाँकेमा किसानहरूले भदौ पहिलो सातासम्म धान रोपाइँ गर्ने भएकाले अहिलेको गतिलाई स्वाभाविक मान्नुपर्ने कार्यालयको भनाइ छ । सिक्टा सिँचाइ सुविधा उपलब्ध भएका क्षेत्र तथा पम्पसेट एवं मोटरको प्रयोग गरी धानको ब्याड राखेका किसानहरूले वर्षा हुनासाथ धान रोपाइँलाई तीव्र पारेका छन् ।
