सत्यपाटी
बाँकेको राप्तीसोनारी–२, मदुईस्थित लक्ष्मी माध्यमिक विद्यालयका विद्यार्थी उमेश खत्रीले खुट्टाले लेखेरै कक्षा १२ मा ३.४० जिपिए हासिल गरी उच्च सफलता प्राप्त गरेका छन् । खत्रीको दुवै हात नभए पनि सफलता शारीरिक क्षमताले मात्र होइन मेहनत र इच्छाशक्तिले पनि प्राप्त गर्न सकिन्छ भन्ने उदाहरण प्रस्तुत गर्न उनी सफल भएका हुन् ।
खुट्टाले लेखेर खत्रीले १२ कक्षामा राम्रो अङ्क ल्याएपछि अहिले लक्ष्मी माध्यमिक विद्यालयका छात्रछात्रादेखि सम्पूर्ण शिक्षक र मदुवागाउँका सबै स्थानीय खुसी छन् । विद्यालयकी शिक्षिका तथा खत्रीकी ठुलीआमा कमला खत्रीले उमेशका लागि कक्षा १२ को नतिजा शैक्षिक उपलब्धि मात्र होइन, सङ्घर्षमाथिको विजय भएको बताइन् ।
उनले उमेशले भने खुट्टाको सहारामै आफ्नो सपनालाई सफलतामा परिणत गरेर देखाएको बताइन् । कमलाका अनुसार कृषि सङ्काय अध्ययनरत उमेशका दुवै हात चल्दैनन् । सामान्य कामदेखि लेखपढसम्मका गतिविधि उनका लागि चुनौतीपूर्ण छन्, तर उनले आफ्नो शारीरिक अवस्थालाई कहिल्यै बाधक बन्न दिएनन् ।
विद्यालयको पहिलो दिनदेखि नै खुट्टाले कलम समातेर लेख्न सिकेको जनाउँदै कठिनाइलाई कमजोरी होइन, सिकाइको अवसरका रूपमा लिँदै यहाँसम्म पुगेको उमेशले बताए । उनले अझै धेरै पढ्ने इच्छा रहेको जनाउँदै अब कृषिमा उच्च अध्ययनका लागि काठमाडौँ जाने योजना रहेको सुनाए । उच्च अध्ययनका लागि सरकारले विशेष छात्रवृत्ति दिएर सहयोग गर्नुपर्ने माग पनि उनले माग गरे ।
राप्तीसोनारी गाउँपालिका–२, मदुवा निवासी खत्रीको जन्मदेखि नै दुवै हात नभएको र खुट्टा पनि नचल्ने अवस्थामा रहेको जनाउँदै उनकी आमा गोमा खत्रीले पछि बनेपास्थित अस्पतालमा लगेर खुट्टाको शल्यक्रिया गरिएपछि हिँड्न सक्ने भएको बताइन् । उमेशका पिता टेकबहादुर खत्री सशस्त्र प्रहरीमा कार्यरत छन् ।
विद्यालयका प्रधानाध्यापक लक्ष्मण आचार्यले उमेशको सफलता र मेहनेत कुनै सामान्य खालको नभएको जनाउँदै यो अभूतपूर्व भएकोले यसबाट सम्पूर्ण विद्यालय परिवार गौरवान्वित बनेको प्रतिक्रिया दिए । उनले भने, ‘उमेशले शारीरिक पीडा, थकान र असहजताबीच पनि आफ्नो लक्ष्यबाट ध्यान हटाएनन् । निरन्तर अभ्यास, परिवारको साथ र शिक्षकको हौसलाले उनलाई अघि बढ्न निरन्तर ऊर्जा दिइरहयो ।’
