सत्यपाटी
बाँकेको नेपालगन्जका विभिन्न चोक र सडक छेउमै अस्तव्यस्त पार्ने गरि मनपरी तरिकाले सञ्चालन गरिएका अव्यवस्थित र गैर कानुनी बसपार्कलाई नेपालगन्ज उपमहानगरपालिकाले हटाएको छ ।
त्यसरी सञ्चालन गरिएका बसपार्ककै कारण सडक दुर्घटना हुने खतरा बढ्नुका साथै यात्रुको अनावश्यक तानातान र खिचातानी हुने र सडकमा आवागमन समेत प्रभावित हुन थालेको गुनासो उठेपछि नेपालगन्ज उपमहानगरपालिकाले त्यस्ता बसपार्क हटाएको हो ।
बर्दिया गुलरियाकालागि गाडी छुट्ने धम्बोझी चोकनजिकैको खजुरा रोडस्थित बसपार्क र पश्चिम तथा पूर्वका विभिन्न जिल्लाहरुका लागि गाडी छुट्ने पुष्पलाल चोक वाटरपार्कस्थित बसपार्कलाई सोमवार नगर प्रहरीले हटाएको नगर प्रहरी प्रमुख प्रहरी निरीक्षक सूर्यबहादुर बोगटीले बताए ।
उनले नगर प्रहरीको अगुवाईमा नेपाल प्रहरी र ट्राफिक प्रहरीको उपस्थितिमा ती बसपार्कहरु हटाइएको जनाउँदै अब जहाँ पायो त्यहि बसपार्क बनाउन नदिने बताए । उनले नेपालगन्ज–४ मा अत्याधुनिक र सुविधा सम्पन्न बसपार्क हुँदाहुँदै कतिपय ठाउँमा मनलाग्दी अब्यवस्ति र गैरकानुनी तरिकाले बसपार्क राखेकोले पूर्व सूचना अनुसार बसपार्क हटाइएको बताए ।
यसअघि माइकिंग गरेर बसपार्क हटाउन सूचित गरिएको जनाउँदै प्रहरी निरीक्षक बोगटीले बसपार्कबाट गाडी छुट्ने एकद्वार प्रणाली लागू गर्न उपमहानगरपालिका प्रतिबद्ध रहेको बताए । ठाउँठाउँमा अब्यवस्थित बसपार्क हुँदा यात्रुहरुलाई दुःख, हैरानी दिने, तानातान गर्ने प्रबृत्ति रहेको गुनासो उपमहानगरमा पटक पटक आएको उपमहानगरपालिकाले जनाएको छ ।
यस्तै नगर प्रहरीले नेपालगन्ज १० गणेशमान चोकदेखि पश्चिमतर्फ भृकुटीनगरमा ब्यवसाय दर्ता नै नगरी लामो समयदेखि फुटपाथ कब्जा गरेर बसेका व्यवसायीलाई पनि हटाएको छ । नेपाली र भारतीय समेत रहेका ती ब्यवसायीहरुलाई हटाइएको नगर प्रहरी सहायक निरीक्षक पवनकुमार कनौजियाले जानकारी दिए । उनले उनीहरुलाई अनिवार्य रुपमा व्यवसाय दर्ता गर्न समेत निर्देशन दिइएको जनाउँदै अन्य ठाउँमा पनि यसरी नै व्यवसाय दर्ता नगरेर व्यवसाय गर्नेहरुलाई हटाउने जनाए ।
