२०८३ मंसिर ४ , शुक्रबार 20, November 2026, Friday

अभौतिक साँस्कृतिक सम्पदामा सूचीकृत प्रक्रियामा ‘योमरी’

नेवार समुदायको परम्परागत, मौलिक एवं सांस्कृतिक खाद्य परिकार यमरीलाई संयुक्त राष्ट्रसंघीय शैक्षिक, वैज्ञानिक साँस्कृतिक सङ्गठन (युनेस्को)को अभौतिक साँस्कृतिक सम्पदामा सूचीकृत प्रक्रियाबारे छलफल अघि बढेको छ । काठमाडौँ महानगरपालिकाको सम्पदा तथा पर्यटन समितिका पदाधिकारी र समुदायका प्रतिनिधिबीचको छलफलमा यस्तो प्रक्रिया अघि बढाइएको समितिका संयोजक आशामान सङ्गतले जानकारी दिए ।

‘हरेक शुभकार्यसँग जोडिएको यमरीको महत्त्व र पहिचानलाई राष्ट्रियकरण गर्दै अभौतिक युनेस्कोको अभौतिक सम्पदा विधामा सूचीकृत गराउनु अन्तर्राष्ट्रियकरणको प्रक्रिया हो । यसले नेपालकै पहिचान वृद्धि हुन्छ,’ छलफलमा समितिका संयोजक आशामान सङ्गतले भने, ‘योमरी बनाउने परम्परा खाद्य परिकारमात्र होइन । प्रकृति, कृषि पेसा, धार्मिक, साँस्कृतिक तथा सामाजिक पक्षसँग गहिरो सम्बन्ध राख्छ ।’

त्यस क्रममा समितिका सदस्य एवं वडा १८ का अध्यक्ष न्हुच्छेकाजी महर्जनले, सूचीकृत हुने प्रक्रियालाई निर्धारित समयभित्रै सक्नुपर्नेमा जोड दिए । उनले, यस्ता सम्पदाको गरिमा प्रवर्धनमा सबै मिलेर काम गर्नुपर्ने धारणा उनले राखे । यमरीको गरिमालाई स्थानीयस्तरमा पनि प्रवर्धन गर्न अभिमुखीकरण र प्रशिक्षण सञ्चालन गर्नुपर्ने महर्जनले बताए ।

छलफल र अन्तक्र्रियालाई नियमितता दिइने, त्यस्ता कार्यक्रममा समुदायका अगुवाहरूको सुझाव र प्रतिक्रियालाई ग्रहण गरिने सम्पदा तथा पर्यटन विभागका प्रमुख कुमारी राईको भनाइ छ । अभौतिक सांस्कृतिक सम्पदा सम्बन्धी महासन्धि २००३ मा भएको हो । नेपाल सन् २०१० मा पक्ष राष्ट्र भएको हो । यसअन्तर्गत आफ्नो देशभित्र रहेका अभौतिक सांस्कृतिक सम्पदाहरूको सूची तयार पार्नु, अनुसन्धान गर्नु, सुरक्षा, संरक्षण र प्रवद्र्धन तथा परम्परालाई निरन्तरता दिनु महत्त्वपूर्ण काम हुन् ।

प्रकाशित मिति : २०८२ माघ २३ गते शुक्रबार