लुम्बिनी प्रदेश सरकारको नियमन क्षेत्रभित्र पर्ने दर्जनभन्दा बढी संख्याका सहकारीमा समस्या देखिएको छ । लुम्बिनी प्रदेश सहकारी रजिष्ट्रार कार्यालयका अनुसार प्रदेश सरकारको नियमन क्षेत्रभित्र पर्ने २० वटा सहकारी संस्थाहरूमा समस्या देखिएको हो । समस्या देखिएकामा अधिकांश सहकारीहरू रूपन्देहीका हुन् ।

प्रदेश सहकारी रजिष्ट्रार कार्यालयका अनुसार हालसम्म समस्याग्रस्तमध्ये १३ वटा सहकारी रूपन्देहीका र अन्य सात वटा सहकारी प्रदेशका अन्य जिल्लाका हुन् । प्रदेशको नियमन क्षेत्रभित्र पर्ने ६ वटा सहकारीहरूमा आर्थिक अपचलन भएको र आठ वटामा बचत फिर्ता नभएको विषयलाई लिएर उजुरी परेको छ । त्यस्तै, तीनवटा सहकारीका सञ्चालकहरू बचत फिर्ता नगरी कार्यालय बन्द गरेर फरार छन् ।

प्राप्त सूचनाअनुसार; रूपन्देहीका सप्तदीप बहुउद्देश्यीय सहकारी, उपकार बहुउद्देश्यीय सहकारी र उपदेश बहुउद्देश्यीय सहकारी संस्थाका सञ्चालकहरू सदस्यहरूबाट निक्षेप संकलन गरी कार्यालय नै बन्द गरी फरार भएको उजुरी रजिष्ट्रार कार्यालयमा परेको छ । रजिष्ट्रार कार्यालयले ती सहकारीका सञ्चालक सम्पर्कविहीन भएपछि प्रहरीसँग समन्वय गरी खोज्ने काम भइरहेको जनाएको छ ।

त्यस्तै, प्रदेशको नियमन क्षेत्राधिकारभित्र रहेका रूपन्देहीका सुनौलो बचत तथा ऋण, आगन्तुक बचत तथा ऋण, मार्गदर्शन बहुउद्देश्यीय, सुप्रिम बचत तथा ऋण, साइन बहुउद्देश्यीय, सार्थक बहुउद्देश्यीय, मञ्जुश्री बहुउद्देश्यीय, त्रैयम्बकम जडिबुटी र विश्व विराट बहुउद्देश्यीय सहकारीहरूले बचत अपचलन गरेको तथा बचत फिर्ता नगरेको उजुरी रजिष्ट्रार कार्यालयमा परेका छन् ।

जसमध्ये सुनौलो बहुउद्देश्यीय सहकारीसँग समन्वय गर्ने काम भइरहेको, आगन्तुक बचत तथा ऋण सहकारीमाथि अदालतमा मुद्दा प्रकृया अगाडि बढेको र मार्गदर्शन बचत तथा ऋण सहकारीको सञ्चालक फरार भएकोले कानूनी प्रक्रिया अगाडि बढाएको कार्यालयले जनाएको छ । कार्यालयका अनुसार गोर्खा मिडिया नेटवर्कमा समेत रकम आएको भनिएको सुप्रिम बचत तथा ऋण सहकारीको विषयमा अदालतमा मुद्दा प्रक्रिया अघि बढेको छ ।

साइन बहुउद्देश्यीय सहकारीका सञ्चालकसँग रकम फिर्ताको कागज गराएकोमा कार्यान्वयन नभएको, सार्थक बहुउद्देश्यीयका सञ्चालक फरार भएकाले प्रहरीमा मुद्दा दायर भएको र मञ्जुश्री बहुउद्देश्यीय सहकारीका अध्यक्षलाई बचत फिर्ताको कबुलियत गराइएको कार्यालयले जनाएको छ । रजिष्ट्रार कार्यालयमा रूपन्देहीकै आयाम बचत तथा ऋण सहकारी गैरकानूनी हिसाबले सञ्चालन भएर बचत गरेको उजुरी परेको र सो सहकारीमाथि अनुसन्धान गरेर सम्पूर्ण बचत फिर्ता गराइएको कार्यालयले जनाएको छ ।

त्रैयम्बकमका सञ्चालक फरार रहेको र विश्व विराट बहुउद्देश्यीय सहकारीले रकम फिर्ता गर्ने क्रम अगाडि बढाएको प्राप्त विवरणमा उल्लेख छ । प्रदेश सरकारकै नियमन क्षेत्रभित्र पर्ने बर्दिया र बाँकेको नमस्ते बचत तथा ऋण सहकारी, दाङको राजधानी बचत तथा ऋण, नागरिक बचत तथा ऋण र जनसेवा बहुउद्देश्यीय सहकारीमा बचत अपचलन र बचत फिर्ताको समस्या देखिएको उजुरी कार्यालयमा परेका छन् ।

जसमध्ये बर्दिया र बाँकेको नमस्ते बचत तथा ऋण सहकारीको विषयमा प्रहरीमा मुद्दा दायर भएको, दाङको राजधानी बचत तथा ऋण सहकारीको समस्या यथावत रहेको र नागरिक बचत तथा ऋण सहकारीका सञ्चालक नै फरार रहेको रजिष्ट्रार कार्यालयले जनाएको छ । त्यस्तै, दाङको जनसेवा सहकारीलाई बचत फिर्ता गर्न निर्देशन दिइएको र गुल्मीको राष्ट्रिय बचत तथा ऋण सहकारीलाई जिल्ला प्रशासनसँगको समन्वयमा कारबाही प्रक्रिया अगाडि बढाइएको कार्यालयले जनाएको छ ।