बाँकेमा सोमबार साँझ आएको भीषण हावाहुरीका कारण दुई सय भन्दा बढी विद्युतका पोल र चार वटाभन्दा बढी ट्रान्सफर्मर ढलेर क्षतिग्रस्त भएपछि बाँकेका अधिकांश स्थानको विद्युत् सेवा अवरुद्ध भएको छ ।
नेपाल विद्युत् प्राधिकरण नेपालगन्ज वितरण केन्द्रले दिएको जानकारी अनुसार भीषण हावाहुरीले धेरै ठाउँका विद्युत् पोलहरू ढालेर क्षतिग्रस्त बनाएकोले सोमवार साँझबाटै बाँकेमा विद्युत् सेवा अवरुद्ध भएको हो ।
नेपाल विद्युत् प्राधिकरण नेपालगन्ज वितरण केन्द्रका प्रमुख जगन्नाथ लामिछानेले हावाहुरीले विभिन्न ठाउँका २०० बढी पोल र चार वटा ट्रान्सफर्मर ढालेर क्षति पुर्याउँदा विद्युत् सेवा अवरुद्ध भएको बताउनुभयो ।
उहाँले हावाहुरी रोकिने बित्तिकै वितरण केन्द्रबाट प्राविधिकहरूको पाँच वटा टोलीलाई परिचालन गरेर ढलेका पोलहरूको मर्मत सम्भारमा खटाइएको बताउनुभयो । सोही प्रकारले तीन वटा ठेकेदारलाई क्रेनसहित परिचालन गरेर पोल र ट्रान्सफर्मरको मर्मतका लागि खटाइएको प्रमुख लामिछानेले बताउनुभयो ।
सोमवार राती फेरि हावाहुरी आएको र वर्षा समेत भएकोले क्षतिको खोजी र मर्मत सम्भारको कार्य पनि अवरुद्ध हुन जाँदा विद्युत् सुचारु गर्न नसकिएको नेपालगन्ज वितरण केन्द्रले जनाएको छ ।
मङ्गलवार बिहान चार बजेबाटै फेरी ती आठ वटै टोलीलाई परिचालन गरेर पोल र ट्रान्सफर्मर खडा गर्ने तथा तार फेरी जोड्ने कार्य सुरु गरिएको जनाउँदै त्यसपछि अहिले केही ठाउँको विद्युत् आंशिक रूपमा सुचारु गर्न सकिएको नेपालगन्ज वितरण केन्द्रका प्रमुख लामिछानेले बताउनुभयो ।
अहिले मर्मत सम्भार र चुँडिएका तार जोड्ने कार्य तीव्र गतिमा भइरहेकोले मङ्गलवार बेलुकासम्म नेपालगन्ज बजारको विद्युत् पूर्ण रूपमा सुचारु हुने आशा रहेको उहाँले बताउनुभयो ।
सोही प्रकारले नेपाल विद्युत् प्राधिकरण खजुरा वितरण केन्द्रका प्रमुख हीरामणि घर्तिमगरले खजुरा क्षेत्रमा पनि धेरै पोलहरूमा क्षति भएको तथा ठाउँ ठाउँमा तारहरू समेत चुँडिएको जनाउँदै सोमवार रातभरि काम गरेको र अझै मर्मत जारी रहेको बताउनुभयो ।
उता, लुम्बिनी प्रदेश डिभिजन कार्यालय नेपालगन्जका प्रमुख राजीव सिंहले हावाहुरीले प्रदेशका विभिन्न जिल्लामा भएको क्षति सङ्कलनको काम भइरहेको बताउनुभयो । उहाँले विभिन्न ठाउँमा धेरै क्षति भएकोले विवरण सङ्कलन भइरहेको हुँदा सबैतिरको क्षति बारे एक दुई दिनमा मात्रै जानकारी हुने बताउनुभयो ।
नेपाल विद्युत् प्राधिकरण नेपालगन्ज वितरण केन्द्रले हावाहुरी र पानीका कारण प्रायःजसो सबै स्थानहरूमा वितरण तथा प्रसारण लाइनको पोल र तारमा क्षति पुगेको हुँदा विद्युत् पुनः सुचारु गर्न केही समय लाग्ने देखिएकोले ग्राहक वर्गमा धैर्य गरी बसिदिन हुन अनुरोध गरेको छ ।
साथै विद्युत् पोल, तार ट्रान्सफर्मर लगायत कुनै पनि उपकरण नछुनसमेत सर्वसाधारणलाई वितरण केन्द्रले आग्रह गरेको छ ।
समाचारको लागि
फोन : ०८१-५९०५०९, ९८५८०४००६४, ९८५८०७४२५०
Email : [email protected], [email protected]
विज्ञापनका लागि
Phone : ०८१-५९०५०९, ९८५८०४००६४, ९८५८०७४२५०
Email : [email protected]
अध्यक्ष-सम्पादक : काशीराम शर्मा
कार्यकारी निर्देशक : विष्णु सापकोटा
कार्यकारी सम्पादक : शोभा केसी
Copyright © All right reserved to Satyapati.com. Site By: Aarush Creation
Design : Aarush Creation
सत्यपाटी संवाददाता । बाँके