पछिल्लो समयमा परेको पानी आगामी शुक्रबारसम्म नै पर्नसक्ने मौसविद्ले जनाएका छन् । मनसुन र पश्चिमी वायुका कारण देशभरी नै बादल लाग्ने पानी पर्ने भइरहेको मौसमविद् रोजन लामिछानेले बताए ।
अहिले बागमती प्रदेशको पश्चिमी भू–भागदेखि सुदूरपश्चिम प्रदेशसम्म नै बादल लागेको छ र केही ठाउँहरूमा मेघगर्जन, चट्याङ र हावाहुरी सहित पानी परिरहेको छ,’ उनले भने, ‘कतिपय ठाउँमा मध्यम र कतिपय ठाउँमा भारी वर्षा भइरहेको देखिन्छ, कतिपय ठाउँमा असिना पर्ने सम्भावना पनि छ ।’
यसमा पश्चिमी वायुको न्यूनचापीय प्रणाली र पश्चिमी वायुको प्रभाव पनि रहेको उनले बताए । उनले आजको दिनमा बागमती प्रदेश र पश्चिमी क्षेत्रमा मौसम खराब रहेको पनि बताए । उनका अनुसार साँझसम्म मौसममा सुधार हुने र भोलिबाट फेरि बादल बन्ने र पानी पर्ने अवस्था रहेको छ ।
‘शुक्रबारसम्म मौसम प्रणाली खराब छ, शनिबारबाट सुधार हुने देखिन्छ र आइतबारबाट राम्रो हुन्छ,’ उनले भने । मौसमविद् लामिछानेले शुक्रबारसम्म पानी पर्ने र शनिबारबाट मात्रै सुधार हुने हुँदा धान काट्ने काम आइतबारबाट मात्रै गर्न राम्रो हुने बताए ।
