फ्लाई दुबईको उडानमा ककपिटभित्र भएको कथित आक्रमणलाई विफल पार्ने भारतीय पाइलट क्याप्टेन स्मित माछरसँग इजरायलका प्रधानमन्त्री बेन्जामिन नेतन्याहूले फोनमा कुराकानी गरेका छन् । शनिबार भएको कुराकानीमा नेतन्याहूले कठिन परिस्थितिमा माछरले देखाएको साहस, धैर्य र सुझबुझको प्रशंसा गर्दै उनलाई इजरायल, भारत र विश्वकै हिरो बताएका छन् ।
नेतन्याहूले माछर र भारतीय प्रधानमन्त्री नरेन्द्र मोदीलाई आगामी इजरायली स्वतन्त्रता दिवस समारोहमा सहभागी भएर मशाल प्रज्वलन गर्न निमन्त्रणा दिएका छन् । इजरायलको स्वतन्त्रता दिवसमा मशाल प्रज्वलन विशेष सम्मानका रूपमा लिइन्छ । फोन संवादका क्रममा माछरले विमानभित्र भएको घटनाबारे नेतन्याहूलाई जानकारी गराएका थिए ।
उनका अनुसार उडान सामान्य रूपमा सञ्चालन भइरहेको बेला सह–पाइलटले प्रार्थना गर्न जाने बताएका थिए । त्यसपछि उनी पछाडितर्फ गएका थिए । माछरका अनुसार करिब चारदेखि पाँच मिनेटपछि उनको टाउकोको पछाडिपट्टि अचानक जोडदार प्रहार भयो । सुरुमा विमानमा प्राविधिक समस्या आएको हुनसक्ने उनलाई लागेको थियो ।
तर लगातार आक्रमण भएपछि सह–पाइलटले नै आफूलाई प्रहार गरिरहेको उनले थाहा पाए । लगातारको आक्रमणका कारण आँखा अगाडि धमिलो देखिन थालेको र विमान तीव्र गतिमा तल झरिरहेको महसुस भएको माछरले बताएका छन् । उनले एकपटक ककपिटको ढोका खोल्न सफल भए पनि सह–पाइलटले पुनः बन्द गरिदिएको बताए ।
आफू ककपिटभित्रै लडिसकेको अवस्थामा पनि विमानमा रहेका यात्रुको ज्यान बचाउन ढोका खोल्नुपर्ने महसुस भएपछि उनले अन्तिम शक्ति लगाएर पुनः प्रयास गरेको बताएका छन् । अन्ततः ककपिटको ढोका खोल्न सफल भएपछि अन्य चालक दलका सदस्य र यात्रुहरूले भित्र प्रवेश गरी सह–पाइलटलाई नियन्त्रणमा लिन सहयोग गरेका थिए । घटना फ्लाईदुबईको एफजेड १०७३ उडानमा भएको थियो ।
दुबईबाट तेलअभिवतर्फ गइरहेको विमानमा १७४ यात्रु सवार थिए । घटनाका क्रममा विमानले आपत्कालीन संकेत पठाएको थियो भने करिब ३४ हजार फिटको उचाइबाट तीव्र गतिमा तल झरेको बताइएको छ । त्यसपछि विमानलाई साउदी अरबको तबुकमा आपत्कालीन अवतरण गराइएको थियो । घटनामा माछर गम्भीर रूपमा घाइते भएका थिए । प्रारम्भिक उपचारपछि उनलाई थप उपचारका लागि अबुधाबी लगिएको बताइएको छ ।
यसैबीच, द वाल स्ट्रिट जर्नलले घटनाबारे जानकार व्यक्तिलाई उद्धृत गर्दै सह–पाइलट ओमानका नागरिक हमाम अल–हम्मामी रहेको उल्लेख गरेको छ । यद्यपि, फ्लाईदुबईले दुवै पाइलटको पहिचान सार्वजनिक रूपमा पुष्टि नगरेको केही रिपोर्टमा जनाइएको छ । घटनाबारे सम्बन्धित निकायबाट अनुसन्धान जारी छ । माछरको साहसको प्रशंसा गर्दै नेतन्याहूले उनलाई आगामी इजरायली स्वतन्त्रता दिवस समारोहमा सम्मान गर्न चाहेको बताएका छन् ।
