धादिङको गंगाजमुना गाउँपालिका–५ निवासी २४ वर्षीया ममता तामाङको जटिल प्रसूति समस्या देखिएपछि हवाई उद्धार गरी उपचारका लागि काठमाडौँ ल्याइएको छ ।
अवस्था जटिल भई ज्यान नै जोखिममा परेकी तामाङको महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्रालयद्वारा सञ्चालित ‘राष्ट्रिय महिला सशक्तीकरण परियोजना’ अन्तर्गत हवाई उद्धार गरिएको हो ।
उद्धारलगत्तै उनलाई थप उपचारका लागि काठमाडौँको थापाथलीस्थित परोपकार प्रसूति तथा स्त्री रोग अस्पताल पुर्याइएको छ । हाल अस्पतालमा उनको आवश्यक विशेषज्ञ उपचार भइरहेको छ ।
दुर्गम तथा भौगोलिक रूपमा विकट क्षेत्रका जटिल प्रसूति अवस्थाका गर्भवती तथा सुत्केरी महिलाहरूलाई समयमै विशेषज्ञ स्वास्थ्य सेवा पुर्याई जीवनरक्षा गर्ने उद्देश्यले मन्त्रालयले यो आपत्कालीन हवाई उद्धार कार्यक्रम सञ्चालन गर्दै आएको छ ।
प्रकाशित मिति : २०८३ असोज १४ गते बुधबार
