बाँके जिल्लाको उढरापुरस्थित किरण नाला खोलामा जलसतहले सतर्कता तह पार गरेपछि तल्लो तटीय क्षेत्रका बासिन्दालाई उच्च सतर्कता अपनाउन बाढी पूर्वानुमान महाशाखाले आग्रह गरेको छ ।
शनिबार दिउँसो १ः०६ बजे किरण नाला जलमापन केन्द्रमा जलसतह सतर्कता तहभन्दा माथि पुगेको महाशाखाले जनाएको छ । जलसतह बढेकाले नदी आसपासका र विगतमा डुबान भइरहने ठाउँका बासिन्दालाई बेलुकीसम्मै उच्च सतर्क रहन महाशाखाले सूचित गरेको छ ।
बाढीको जोखिम बढेको जानकारी दिँदै बाढी पूर्वानुमान महाशाखाले भनेको छ, ‘किरण नाला खोलाको जलमापन केन्द्रमा जलसतहले सतर्कता तह पार गरेकाले तल्लो तटीय क्षेत्र र नदी आसपास डुबान भइरहने ठाउँका बासिन्दा बेलुकीसम्मै उच्च सतर्क रहनुहोला ।’
प्रकाशित मिति : २०८३ असोज १० गते शनिबार
