ज्येष्ठ नागरिक महिलाको स्वास्थ्य, सक्रिय जीवनशैली तथा मनोसामाजिक सुस्वास्थ्यप्रति सचेतना अभिवृद्धि गर्दै पुस्ताबीचको सम्बन्धलाई थप आत्मीय र सुदृढ बनाउने उद्देश्यले नेपालगन्जमा ‘दौडिन्छन् हजुरआमा’ कार्यक्रमको दोस्रो संस्करण भदौ २१ गते हुने भएको छ ।
दैनिक नेपालगन्जको प्रकाशन संस्था सम्यक हब मिडिया प्रालिको आयोजना तथा नाट्टा बाँके च्याप्टरको सहआयोजनामा कार्यक्रम हुन लागेको हो । आयोजकका अनुसार आइतबारदेखि कार्यक्रमका लागि सहभागिता दर्ता खुला गरिएको छ । कार्यक्रममा सहभागी हुन शुल्क लाग्ने छैन ।
आयोजकका अनुसार कार्यक्रमको रणनीतिक साझेदारका रूपमा धारा नेपालगन्ज म्याराथनले सम्पूर्ण प्राविधिक जिम्मेवारी सम्हाल्नेछ । आयोजकले ‘दौडिन्छिन् हजुरआमा’लाई केवल दौड प्रतियोगिताका रूपमा नभइ ज्येष्ठ महिलाको शारीरिक सक्रियता, आत्मविश्वास, सामाजिक सहभागिता र मनोसामाजिक खुसी प्रवर्द्धन गर्ने सामाजिक अभियानका रूपमा अघि बढाएको छ ।
कार्यक्रमअन्तर्गत ५० वर्ष उमेर पूरा गरेका हजुरआमाबीच दौड प्रतियोगिता हुनेछ । सहभागीहरूले नेपालगन्जको वीपीचोकदेखि धम्बोझी चोकसम्मको एक हजार एक मिटर दूरी पार गर्नेछन् । प्रतियोगितामा जीत–हारभन्दा आफ्नै उमेर र क्षमतामाथि विश्वास गर्दै सक्रिय जीवनको उत्सव मनाउने विषयलाई प्राथमिकता दिइएको आयोजकको भनाइ छ । दौडअघि स्वास्थ्य शिविरसमेत सञ्चालन गरिनेछ ।
शिविरमा स्वास्थ्य परामर्श, स्वास्थ्य परीक्षण तथा आधारभूत उपचारको व्यवस्था गरिने बताइएको छ । यसअघि आयोजित पहिलो संस्करणमा ५० वर्षभन्दा माथिका १५० भन्दा बढी हजुरआमा सहभागी भएका थिए । पहिलो संस्करणको प्रतियोगितामा नेपालगन्ज उपमहानगरपालिका –२० नयाँबस्ती थपुवाकी ५५ वर्षीया धनसरा बुढा प्रथम, नन्दमाया वली द्वितीय र नेपालगन्जकी रेवती सिंह तृतीय भएकी थिइन् ।
पहिलो संस्करणमा हजुरआमाहरूको उत्साह, सहभागिता र आत्मविश्वासले कार्यक्रमलाई थप विस्तार गर्न प्रेरणा दिएको आयोजकले जनाएको छ । यही अनुभवलाई फराकिलो बनाउँदै यस वर्ष कार्यक्रमलाई दौडमा मात्र सीमित नराखी ‘भन्छिन् हजुरआमा’ अन्तरपुस्ता संवाद आयोजना गरिने भएको छ । संवाद कार्यक्रममा ५० वर्ष पार गरेका हजुरआमा र नयाँ पुस्ताका ५० भन्दा बढी छोरीहरूबीच प्रत्यक्ष संवाद हुनेछ ।
हजुरआमाहरूले आफ्ना जीवनका संघर्ष, अनुभव, सपना, सिकाइ र भोगाइ सुनाउने छन् भने नयाँ पुस्ताले ती अनुभव सुन्ने, बुझ्ने र संवादमार्फत सम्बन्धलाई नयाँ अर्थ दिने अवसर पाउने छन् । आयोजकका अनुसार पुस्तान्तरण सम्पत्ति वा ज्ञानको हस्तान्तरणमा मात्र सीमित नभई जीवन भोगाइ र भावनाको हस्तान्तरणसमेत हो । हजुरआमाका अनुभव र कथालाई नयाँ पुस्तासम्म पु¥याउँदै परिवार, समाज र इतिहाससँग जोड्ने तथा पुस्ताबिचको भावनात्मक दूरी घटाउने उद्देश्यले संवाद कार्यक्रम आयोजना गर्न लागिएको हो ।
द गोल्डेन ग्रान्डमाकी संयोजक सजल गैरेले आगामी दिनमा अभियानलाई अझ व्यवस्थित र प्रभावकारी बनाउँदै ज्येष्ठ नागरिक महिलाको स्वास्थ्य, सामाजिक सहभागिता, आत्मविश्वास तथा अन्तरपुस्ता सम्बन्धसँग जोडिएको वार्षिक कार्यक्रमका रूपमा स्थापित गर्ने लक्ष्य लिइएको बताइन् । ‘दौडिन्छिन् हजुरआमा’ केवल दौड नभएर हजुरआमाको सम्मान, स्वस्थ बुढ्यौलीको प्रवर्धन र पुस्ताबिचको सम्बन्धलाई अझ आत्मीय बनाउने सामाजिक अभियानका रूपमा अघि बढाइएको आयोजकले जनाएको छ ।
