बेलायतको राष्ट्रिय मौसम कार्यालयले यस वर्षको एलनिनो एक शताब्दीभन्दा बढी अवधिमै सबैभन्दा शक्तिशाली हुन सक्ने पूर्वानुमान गरेको छ । उष्णकटिबन्धीय प्रशान्त महासागरको सतहको तापक्रम असामान्य रूपमा बढ्दा विश्वका विभिन्न क्षेत्रमा मौसमको ढाँचा प्रभावित हुने सम्भावना रहेको कार्यालयले जनाएको छ ।
उष्णकटिबन्धीय पूर्वी प्रशान्त महासागरको समुद्री सतहको तापक्रम दीर्घकालीन औसतभन्दा कम्तीमा शून्य दशमलव पाँच डिग्री सेल्सियस माथि पुगेपछि एलनिनो घोषणा गरिन्छ । यसले हावाको बहाव, वायुमण्डलीय चाप र वर्षाको ढाँचामा परिवर्तन ल्याउनुका साथै विश्वको औसत तापक्रम बढाउन सक्छ ।
मौसम कार्यालयका दीर्घकालीन पूर्वानुमान प्रमुख एडम स्काइफले यस वर्ष समुद्री तापक्रमको असामान्यता तीन डिग्री सेल्सियसभन्दा माथि पुग्न सक्ने बताए । उनले यस्तो तीव्र एलनिनोको सङ्केत यसअघि नदेखेको बताउँदै यसलाई ‘अभूतपूर्व घटना’ भने । उनका अनुसार दक्षिण अमेरिका र पश्चिमी प्रशान्त क्षेत्रमा गम्भीर तथा लामो खडेरी पर्न सक्नेछ ।
क्लाइमेट ब्रिङ्क ड्यासबोर्डका अनुसार उक्त क्षेत्रमा समुद्री तापक्रम हाल ३० वर्षको औसतभन्दा २.६ डिग्री सेल्सियस माथि छ । स्काइफले एलनिनोको प्रभाव छोटो अवधिको मौसममा मात्र सीमित नहुने बताउँदै खाद्य उत्पादन र खाद्य सुरक्षामा समेत असर पर्न सक्ने उल्लेख गरे । बेलायतमा भने नोभेम्बरतिर सामान्यभन्दा बढी वर्षा र आँधीबेहरीको सम्भावना रहेको उनले बताए ।
