कर्णाली राजमार्ग अन्तर्गत दैलेखको संगेतरा क्षेत्रमा सवारी दुर्घटनामा परी बेपत्ता भएका चालक तुलाराम सुवेदीको शव फेला परेको छ । दुर्घटनाको नौ दिनपछि शनिबार (असार २७) बिहान करिब ७ बजे उनको शव भेटिएको प्रहरीले जनाएको छ ।
सुर्खेतको पञ्चपुरी नगरपालिका–८, माझीगाउँ निवासी चालक सुवेदीको शव अछामको तुर्माखाँद गाउँपालिका–२, जमगडास्थित कर्णाली नदीको किनारमा फेला परेको जिल्ला प्रहरी कार्यालय दैलेखका प्रमुख एवं डीएसपी श्रवणकुमार विकले जानकारी दिए ।
तुलारामका बुवाले शव बुझिसकेको उनले बताए । दुर्घटनामा बेपत्ता भएका उनका सहोदर भाइ तथा गाडीका सहचालक रामप्रसाद सुवेदीको अवस्था भने अझै अज्ञात रहेको प्रहरीले जनाएको छ ।
यही असार १८ गते बिहान करिब ११ः३० बजे सुर्खेतबाट कालीकोटतर्फ जाँदै गरेको कर्णाली प्रदेश ०२–००१ ख १०५५ नम्बरको फोर्स गाडी दैलेखको चामुण्डा बिन्द्रासैनी नगरपालिका–७ स्थित सडकबाट झन्डै ४०० मिटर तल कर्णाली नदीमा खसेको थियो ।
दुर्घटनाका बेला गाडीमा पाँचजना सवार थिए । उनीहरूमध्ये कालीकोटको पचालझरना गाउँपालिका–९ का ५४ वर्षीय जेखे तिरुवा भीरमा अड्किएको अवस्थामा जीवितै फेला परेका थिए । उपचारका क्रममा उनलाई अस्पतालले मृत घोषणा गरेको थियो ।
चालक तुलाराम सुवेदीको शव फेला परेसँगै दुर्घटनामा मृत्यु हुनेको संख्या चार पुगेको छ । अरूको शव यसअघि फरक–फरक मिति र स्थानमा भेटिएको थियो । सहचालक सुवेदी र दुर्घटनाग्रस्त गाडीको अवस्था अझै अज्ञात छ । उनीहरूको खोजीकार्य जारी रहेको प्रहरीले जनाएको छ ।
