पश्चिम नेपालको स्वास्थ्य सेवामा उत्कृष्ट भूमिका निर्वाह गर्दै आइरहेको नेपालगन्जस्थित हेल्थ केयर अस्पताल तथा प्रसुति गृह (एचसीआरसी अस्पताल)ले अन्तर्राष्ट्रिय स्तरमा मान्यता प्राप्त गरेको छ । यस उपलब्धिसँगै एचसीआरसी अस्पताल अग्रणी स्वास्थ्य संस्थाका रूपमा थप स्थापित भएको विश्वास गरिएको छ ।
गुणस्तरीय स्वास्थ्य उपचारमा अग्रणी रहेको एचसीआरसी अस्पतालले आइएसओ ९००१ः२०१५ गुणस्तर व्यवस्थापन प्रणाली अन्तर्गतको प्रमाणीकरण प्राप्त गरेको हो । गुणस्तरीय स्वास्थ्य सेवा प्रवाहका लागि अन्तर्राष्ट्रिय गुणस्तरको आइएसओ प्रमाणीकरण प्रदान गरिएको आइएसओका प्रमुख लेखा परीक्षक भोजराज तिमिल्सिनाले जानकारी दिए ।
उनका अनुसार अस्पतालको व्यवस्थापन प्रणाली, कार्य प्रणाली र सेवा प्रवाहको विस्तृत मूल्याङ्कनपछि अन्तर्राष्ट्रिय गुणस्तरको आइएसओ प्रमाणीकरण प्रदान गरिएको हो । आइएसओका प्रमुख लेखा परीक्षक तिमिल्सिनाले अस्पतालका संस्थापक अध्यक्ष तथा प्रमुख डा.कुमारसान शाहलाई प्रमाणीकरणको प्रमाणपत्र हस्तान्तरण गरेका छन् ।
यस उपलब्धीले गुणस्तरीय स्वास्थ्य सेवा, बिरामी सुरक्षाको सुनिश्चितता तथा संस्थागत व्यवस्थापनप्रति अस्पतालको प्रतिबद्धतालाई अझ सुदृढ बनाएको अस्पतालले जनाएको छ । उनका अनुसार यसले सेवा गुणस्तर सुनिश्चित गर्दै निरन्तर सुधार र मानकीकृत कार्य प्रणालीप्रति अस्पतालको प्रतिबद्धता झल्काएको प्रमुख डा.शाहले बताए ।
उनले आइएसओ प्रमाणीकरणले अस्पतालको चिकित्सा सेवा, क्लिनिकल प्रशिक्षण, शिक्षण अस्पताल सेवा, निदान तथा प्रयोगशाला सेवा, रेडियोलोजी, फार्मेसी, आकस्मिक सेवा लगायतका सबै प्रमुख सेवालाई समेटेको बताए । डा.शाहले आइएसओ अन्तर्राष्ट्रिय गुणस्तर मापदण्ड कायम राख्न, सेवाग्राहीको सन्तुष्टि अभिवृद्धि गर्न तथा सेवा प्रवाहलाई अझ प्रभावकारी, व्यवस्थित र सेवाग्राहीमैत्री बनाउन सहयोग पुग्ने विश्वास व्यक्त गरे ।
अस्पतालले दक्ष जनशक्ति विकास र अन्तर्राष्ट्रिय मापदण्ड अनुसार सेवा प्रणाली कार्यान्वयनमा समेत यस प्रमाणीकरणले महत्त्वपूर्ण योगदान पुर्याउने जनाएको छ । अस्पताल प्रमुख डा.शाहले आइएसओ ९००१ः२०१५ प्रमाणीकरणलाई केवल उपलब्धि नभई गुणस्तरीय सेवा, व्यवस्थित प्रणाली र निरन्तर सुधारप्रतिको प्रतिबद्धताको मापनका रूपमा लिनुपर्ने बताए ।
उनले अन्तर्राष्ट्रिय मान्यता प्राप्त गरेपछि बिरामीलाई अझ सुरक्षित, भरपर्दो, व्यवस्थित र मर्यादित स्वास्थ्य सेवा प्रदान गर्न अस्पताल प्रतिबद्ध रहेको उल्लेख गर्दै स्वास्थ्य सेवा र चिकित्सा शिक्षामा उत्कृष्टता कायम राख्न निरन्तर प्रयास जारी रहनुका साथै संस्थाको गुणस्तर सुनिश्चितता, निरन्तर सुधार तथा मानकीकृत कार्य प्रणालीप्रतिको प्रतिबद्धतालाई झल्काउने बताए ।
साथै दक्ष जनशक्ति विकास तथा अन्तर्राष्ट्रिय स्तरअनुरूप सेवा प्रणाली कार्यान्वयनमा समेत यसले महत्वपूर्ण भूमिका खेल्ने अस्पतालको भनाइ छ । आइएसओ ९००१ः२०१५ प्रमाणीकरण प्रमाणपत्र हस्तान्तरण कार्यक्रममा अस्पताल व्यवस्थापन, विभिन्न विभागका प्रमुख, विशेषज्ञ चिकित्सक, नर्सिङ टोली तथा अन्य कर्मचारीहरुको उपस्थिति थियो ।
‘आइएसओ ९००१ः२०१५ प्रमाणीकरण हाम्रो अस्पतालका लागि केवल उपलब्धि मात्र नभई गुणस्तरीय सेवा, व्यवस्थित प्रणाली तथा निरन्तर सुधारप्रतिको प्रतिबद्धताको प्रमाण हो,’ अस्पताल प्रमुख डा.शाहले भने । बिरामीलाई अझ सुरक्षित, व्यवस्थित तथा सम्मानजनक स्वास्थ्य सेवा प्रदान गर्न कलेज निरन्तर प्रतिबद्ध रहने उनको भनाइ छ ।
