एयर डाइनेस्टीको हेलिकोप्टर दुर्घटनामा पाँच जनाको मृत्यु भएको पुष्टि भएको छ । काठमाडौंबाट रसुवाको स्याफ्रुबेंसी उडेको एयर डाइनेस्टीको ९–एन एजेडी कलसाइन भएको उक्त हेलिकप्टर नुवाकोटको शिवपुरी ७ सूर्यचौर डाँडामा दुर्घटनामा परेको हो ।

दुर्घटनामा चार जनाको मृत्यु भएको जिल्ला प्रशासन कार्यालय नुवाकोटका सहायक प्रमुख जिल्ला अधिकारी कृष्णप्रसाद हुमागाईँले पुष्टि गरे । उनले भने, ‘सूर्यचौरमा हेलिकोप्टर दुर्घटना भएको स्थानीयले खबर गरेका थिए । घटनास्थलमा उद्धार टोली पुगिसकेको छ । पाँच जनाको शव फेला परेको छ ।’

उक्त हेलिकप्टरमा चार जना चिनियाँ पर्यटकसहित पाँच जना सवार थिए । त्रिभुवन विमानस्थलबाट हेलिकप्टर १ बजेर ५४ मिनेटमा काठमाडौंबाट उडेको थियो । हेलिकप्टर दुर्घटनास्थलमा आगलागी भइरहेको छ । त्रिभुवन अन्तर्राष्ट्रिय विमानस्थलका अनुसार सो हेलिकप्टर क्याप्टेन अरुण मल्लले उडाइरहेका थिए ।