आज चार वटा प्रदेशमा मुसलधारे वर्षाको सम्भावना रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ । महाशाखाका अनुसार आज दिउँसो कोशी, वागमती, गण्डकी, लुम्बिनी र सुदूरपश्चिमका केही तथा बाँकी प्रदेशका थोरै स्थानमा हल्कादेखि मध्यम वर्षाको सम्भावना छ ।

यस्तै, कोशी र सुदूरपश्चिमका एक–दुई स्थानमा भारी वर्षाको सम्भावना छ । आज राति सुदूरपश्चिमका धेरै, कोशी, वागमती, गण्डकी र लुम्बिनीका केही तथा मधेश र कर्णालीका थोरै स्थानमा हल्कादेखि मध्यम वर्षाको सम्भावना छ । यस्तै, कोशी, वागमती, गण्डकी र सुदूरपश्चिमका एक–दुई स्थानमा भारी वर्षाको सम्भावना छ ।

देशभर मनसुनी वायुको प्रभाव तथा मनसुनको न्यून चापीय रेखा सरदर स्थानको दक्षिणतर्फ रहँदा कोशी, बागमती, लुम्बिनी र सुदूरपश्चिम प्रदेशका एक–दुई स्थानमा भारी वर्षाको सम्भावना रहेकोले ती क्षेत्रहरूमा दैनिक जनजीवन लगायत कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक असर पर्ने सम्भावना रहेको महाशाखाले जनाएको छ ।

साथै ती क्षेत्रमा हुन सक्ने गेग्रान बहाव, बाढी, पहिरो तथा भू–क्षय जस्ता प्रकोपको जोखिम वा क्षतिबाट बच्न तथा यसबाट ती क्षेत्रहरूमा दैनिक जनजीवन लगायत कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक असर पर्ने सम्भावना रहेकोले आवश्यक सतर्कता अपनाउन पनि मौसम पूर्वानुमान महाशाखाको अनुरोध छ ।