सशस्त्र द्वन्द्वका कारण विस्थापित भएको नरैनापुर इलाका प्रशासन कार्यालय २१ वर्षपछि पुनःस्थापना भएको छ । भवन उद्घाटन कार्यक्रममा बोल्दै लुम्बिनी प्रदेश सरकारका ऊर्जा जल स्रोत तथा सिचाई मन्त्री कृष्ण केसीले इलाका प्रशासनको स्थापनासँगै अब स्थानीयवासीलाई जिल्ला सदरमुकाम नेपालगन्ज जानुपर्ने बाध्यताको अन्त्य भएको बताइन् ।

उनले एउटा नागरिकता बनाउनका लागि नेपालगन्ज जानुपर्ने बाध्यताको आजबाट अन्त्य भएको जिकिर गरिन् । बाँकेका प्रमुख जिल्ला अधिकारी खगेन्द्रप्रसाद रिजालले गृह मन्त्रालयसँगको लामो प्रयासपछि दरबन्दी स्वीकृत भएपछि इलाका कार्यालय स्थापना भएको बताए । उनले नेपालमा संघीयता आए पनि नरैनापुरका जनताले संघीताको मर्म बुझ्न नपाएको प्रति दुख व्यक्त गर्दै नागरिकता बनाउन नेपालगन्ज जानुपर्ने बाध्यता सदाका लागि अन्त्य भएको दाबी गरे ।

इलाका प्रशासन कार्यालय नरैनापुर बिगत २१ बर्षदेखि नेपालगन्जस्थित जिल्ला प्रशासन कार्यालय परिसरबाट सञ्चालन हुँदै आएको थियो । नरैनापुरमा इलाका प्रशासन २१ वर्षसम्म स्थापना हुन नसक्नुमा नरैनापुरका जनतामा शिक्षाको कमी भएको बताउदै नरैनापुर गाँउपालिकाका अध्यक्ष इश्तियाक अहमद शाहले शिक्षा बिना कुनै क्षेत्रको विकास हुन नसक्ने भएकोले शिक्षाका लागि हरेक प्रकारको संघर्ष गर्न नरैनापुरवासीलाई अपिल गरे ।

अध्यक्ष शाहले इलाका प्रशासन कार्यालय स्थापना भएपछि विस्थापित नहुने गरी अगाडि बढन गृह प्रशासनसँग आग्रह गरे । नागरिकता, प्रशासनिक लगायत सेवा लिन स्थानीयवासी करिब ४५ किलोमिटरभन्दा बढी दूरी पार गरेर नेपालगन्ज जाने गरेका थिए । गाउँपालिकाले कृषि शाखाको भवन दिएपछि इलाका प्रशासन कार्यालय स्थानान्तरण गरिएको प्रमुख जिल्ला अधिकारी खगेन्द्र प्रसाद रिजालले बताए ।

इलाका प्रशासन नेपालगन्जमा हुँदा नागरिकले शारीरिक सास्तीका साथै समय, पैसा फजुल खर्च भइरहेको छ । सशस्त्र द्वन्द्वकालको समयमा असुरक्षाको कारण देखाउँदै देशभरिका सदरमुकाम बाहिरका कार्यालयजस्तै इलाका प्रशासन कार्यालय नरैनापुर पनि नेपालगन्ज सारिएको थियो । तर, शान्ति सम्झौता भएको दुई दशक बितिसक्दा र अरु ठाउँका कार्यालयहरु आआफ्नो कार्यक्षेत्रमा फर्किसक्दा पनि नरैनापुर क्षेत्रलाई सेवा दिन भनेर स्थापना गरिएको कार्यालय भने नेपालगन्जस्थित जिल्ला प्रशासन कार्यालय परिसरमै राखिएको थियो ।

शान्ति सम्झौतापछि इलाका प्रशासन कार्यालय नरैनापुरमा गएर सेवा दिन सुरु पनि गरेको हो । तर गम्भीर सुरक्षा चुनौति देखिएको भन्दै आर्थिक वर्ष २०७०–०७१ सालमा नेपालगन्ज सारिएको थियो । अनत्ता इलाका प्रशासनको स्थापनाले नरैनापुरबासी हर्षित बनाएको छ । गाउँपालिकाका प्रमुख प्रशासकीय अधिकृत जनकलाल चौधरीले इलाका प्रशासन कार्यालय नरैनापुरमा पुनःस्थापना गर्न विगतमा नरैनापुरवासीले पाँच हजार हस्ताक्षर प्रमुख जिल्ला अधिकारीलाई बुझाएको स्मरण गरे ।

उनले लामो समयपछि नरैनापुरमा स्थापना भएको इलाका प्रशासनले जनतालाई ठुलो राहत पुग्ने जिकिर गरे । कार्यक्रममा राप्तीसोनारी गाउँपालिकाका अध्यक्ष तप्त पौडेल, प्रहरी उपरीक्षक तुलबहादुर कार्की, अनुसन्धानका उपनिर्देशक ओम खड्का, सशस्त्र प्रहरी उपरिक्षक विमल डाँगी, बहिनीपति रबिन श्रेष्ठ, लेखापाल प्रकाश अधिकारी, वडाध्यक्ष र स्थानीय लगायतको सहभागिता थियो । प्रशासकीय अधिकृत माधव सिंहको नेतृत्वमा तीन जना नासु र एक जना कम्प्युटर अपरेटर र दुई जना कार्यालय सहयोगीलाई पठाएको छ ।