सूचनाको शक्ति - The Power Of Information

        

राष्ट्रपतिको उम्मेदवारबाट पछि हट्न वाइडेनमाथि दबाब

अमेरिकामा गत हप्ताको राष्ट्रपतिको बहसपछि, राष्ट्रपति जो वाइडेनमाथि आगामी निर्वाचनमा राष्ट्रपतिको उम्मेदवारबाट पछि हट्ने दबाब बढेको छ ।

८१ वर्षीय वाइडेन बढ्दो उमेर र स्वास्थ्य समस्याका कारण राष्ट्रपतिको उम्मेदवारको रूपमा रिपब्लिकन उम्मेदवार डोनाल्ड ट्रम्पलाई चुनौती दिन नसक्ने भन्दै डेमोक्रेटिक पार्टीभित्र उनले उम्मेदवारी छोड्नुपर्ने माग हुन थालेको हो ।

चौतर्फी दबाब बढ्न थालेपछि वाइडेनले आफ्नो परिवार र क्याम्पेनका अधिकारीहरूसँग यस विषयमा छलफल गरिरहेको अमेरिकी मिडियाहरूले दाबी गरेका छन् । साथै उनले छिटै डेमोक्रेटिक पार्टीका सांसद र गभर्नरहरुसँग छलफल गर्ने बताइएको छ ।

डेमोक्रेटिक पार्टीका नेताहरूले उनलाई राष्ट्रपति पदको लागि आफ्नो उम्मेदवारी त्याग्न आग्रह गरिरहेका छन् । टेक्सासका सांसद लोयड डगेट डेमोक्रेटिक पार्टीका पहिलो नेता हुन् जसले सार्वजनिक रूपमा यो माग गरेका छन् ।

गत जुन २८ आयोजित राष्ट्रपति बहसको क्रममा, वाइडेन डेन धेरै पटक हडबडिरहेको र सुस्त देखिएको थियो । सो बहस ट्रम्पले जितेका थिए । त्यसयता उनको उमेर र क्षमतामाथि पार्टीभित्र प्रश्न उठिरहेको छ ।

समाचार एजेन्सी रोयटर्सले गरेको सर्वेक्षणका अनुसार प्रत्येक तीन पार्टी नेतामध्ये एक जनाले यस हप्ता राष्ट्रपतिको उम्मेदवारीबाट वाइडेनले आफ्नो नाम फिर्ता लिनुपर्ने धारणा राखेका छन् ।

अर्कोतर्फ वाइडेनले भने बहसमा राम्रो प्रदर्शन नगरेकोमा स्पष्टीकरण दिँदै केही दिनसम्म आफू धेरै देशको भ्रमणमा गएको र लगातारको यात्राका कारण बहसको समयमा थाकेको बताएका छन् ।

वाइडेनले उम्मेदवारी फिर्ता लिनुपर्ने आवाज उठिरहेका बेला डेमोक्रेटिक पार्टीबाट सम्भावित उम्मेदवारको समेत चर्चा शुरु भएको छ । यस बीचमा वर्तमान उपराष्ट्रपति कमला ह्यारिस र पूर्व प्रथम महिला मिचेल ओबामाको नाम सबैभन्दा अगाडी रहेको छ ।

धेरै डेमोक्रेट नेताहरुले कमला ह्यारिशलाई उम्मेदवार बनाउनुपर्ने बताएका छन् । तर उनले ट्रम्पलाई टक्कर दिन भने मुस्किल हुने बताइएको छ । केहि डेमोक्रेटहरुले भने मिचेल ओबामा उम्मेदवार बनेमा ट्रम्प सजिलै पराजित हुने अनुमान गरेका छन् । तर मिचेलले भने आफू राष्ट्रपतिको दौडमा नभएको बताउँदै आएकी छन् ।

प्रकाशित मिति : २० असार २०८१, बिहीबार ०९:४४

लोकप्रिय