सूचनाको शक्ति - The Power Of Information

        

बसन्त कुवँर नेपाल प्रहरीका आइजीपी कि ‘सिइओ’ ?

मुलुकको प्रमुख सुरक्षा निकायमध्ये नेपाल प्रहरी र सशस्त्र प्रहरीका आइजीपी विदेशमा रहेका छन् । गृह सचिवलाई लिएर उनीहरु अमेरिका पुगेका हुन् । उनी आजै नेपाल फर्किने कार्यक्रम छ । विश्वका प्रहरी प्रमुखहरुको सम्मेलन भए पनि नेपालबाट गृहसचिव एकनारायण अर्याल पनि सहभागी भएका छन् । जबकि उनी कुनै पनि प्रहरी संगठनको प्रमुख होइनन् ।

यी र यस्तै घट्नाक्रमले नेपालका सुरक्षा निकायलाई निजामति र राजनीतिक दलहरुको स्वार्थ अनुकुल चलाउन थालिएको छ । गृहमन्त्री रवि लामिछाने, आइजीपी बसन्त कुवँर, गृह सचिव एकनारायण अर्याल र मानवस्रोत विभागका एआइजी भीमप्रसाद ढकालको निजि स्वार्थका कारण प्रहरी संगठन कुनै एउटा नीजि संस्थाजस्तो भएको आरोप लागेको छ ।

उनीहरु विदेश भएका बेला केही दिनअघि मात्रै अवकाश पाएका दुई एसएसपी डा.दिपश श्रेष्ठ र सुवास आचार्यले त प्रहरी संगठनलाई स्वार्थमा चलाएको आरोप लगाएका छन् । नेपाल प्रहरी अस्पतालमा कार्यरत दुई प्राविधिक एसएसपी डाक्टरहरु पदावधिका कारण गत शुक्रबारबाट अनिवार्य अवकाशमा गएका छन् ।

त्यसको पछाडि जोडिएका पात्र हुन गृहमन्त्री लामिछानेदेखि आईजीपी हुँदै गृहसचिवसम्म । एसएसपीको ६ वर्षे पदावधिअनुसार प्रहरी अस्पतालको स्वास्थ्य उपसमूहतर्फका एसएसपीद्वय डाक्टर दीपक श्रेष्ठ र सुवास आचार्य अनिवार्य अवकाशमा गएका हुन् । १२ असार २०७५ मा एसएसपीमा बढुवा उनीहरू अवकाश अन्यायपूर्ण छ ।

गृहमन्त्री रवि लामिछाने र गृहसचिव एकनारायण अर्याल तथा आइजीपी बसन्त कुँवरबीच चर्किएको द्वन्द्व र मनपरीतन्त्रले उनीहरुमाथि अन्याय भएको हो । प्रहरी अस्पतालमा डीआइजीको दरबन्दी डेढ महिनादेखि रिक्त थियो । तर पनि उनीहरूको बढुवा प्रक्रिया अघि बढेन र अवकाशमा जान बाध्य भए । उनीहरुको बढुवा समयमै भएको भए डीआइजी भएर थप पाँच वर्ष प्रहरी सेवामा हुन्थे ।

आफ्ना मान्छेलाई बढुवा गर्न जुनसुकै हतकण्डा अपनाउने गृहमन्त्री लामिछाने र आइजीपी कुवँरले व्यावसायिक र इमान्दार अधिकृतमाथि अन्याय गर्दै आएका छन् । झण्डै दुई महिनादेखि अस्पतालमा दरबन्दी खाली हुँदा डीआइजी बढुवा नगर्ने गृहमन्त्री र आइजीपीले केहि दिनअघि मात्रै दरबन्दी रिक्त नहुँदै दुई दिनका लागि डीआइजी पोषराज पोखरेललाई एआइजी सिफारिस गरेका थिए ।

त्यसका लागि सचिव अर्याल र आइजीपी कुँवर पनि सहमत भए । डीआइजी पोखरेल आउँदो २१ असारमै अवकाशमा जाँदैछन् । तर, पनि उनलाई २ दिनको लागि एआइजीको फूली लगाउन बढुवा सिफारिस गरिएको छ । उनीहरु अमेरिकाबाट फर्के लगत्तै पोखरेललाई एआइजीको फूली लगाएर विदा गर्ने तयारी रहेको छ । यो खेलमा गृहसचिव अर्याल र मानवस्रोत विभागका एजाइजी भीमप्रसाद ढकाल पनि सक्रिय छन् ।

ढकालले सबैभन्दा जुनियर एआइजी हुन् । मानवस्रोतमा बसेर सरुवा बढुवा न्यायीक पहलभन्दा पनि ढकालले आफ्नो निजि स्वार्थका लागि काम गरिरहेको आरोप छ । कहिले आइजीपी हटाउन त कहिले प्रहरीको ३० वर्षे सेवाहद हटाउन उनको सक्रियता छ । मानवस्रोत विभागमा सिनियर एआइजीलाई प्रमुख बनाउने चलन छ । तर शक्तिकेन्द्र धाएर ढकालले सो पद हत्याएका छन् ।

एआइजी बढुवा सिफारिस समितिमा गृहसचिव संयोजक हुन्छन् भने प्रधानमन्त्री तथा मन्त्रिपरिषद् कार्यालयका सचिव सदस्य र आईजीपी सदस्य सचिव रहने व्यवस्था छ । प्रहरीको आन्तरिक राजनीतिमा खेल्न खोज्ने गृहसचिव अर्याल न्यायिक सरुवा, बढुवामा भने ध्यान दिँदैनन् । आफ्नालाई बनाउन परे उनले पदीय मर्यादा विपरित राजनीतिक नेतृत्वसँग समेत भेटवार्ता गर्ने गरेका छन् ।

पछिल्ला समय गृहमन्त्रीदेखि आइजीपीसम्मका यस्ता कदमले प्रहरीमा व्यावासायिक अधिकृतको करियर समाप्त हुने चिन्ता उच्च अधिकृतहरुले गर्दै आएका छन् । शुक्रबारमात्रै अन्यायपूर्ण अवकाशमा जानु परेपछि डा.दीपक श्रेष्ठले आइजीपीलाई ‘नालायक सीइओ’को आरोप लगाएका छन् । नेपाल प्रहरी ‘प्राइभेट कम्पनी’मा परिणत भएको उल्लेख गर्दै उनले सामाजिक सञ्जाल फेसबुकमा लेखेका छन्, ‘अहिलेको सीइओ नालायक हो, यसले सबैलाई नालायक नै देख्छ ।’

एसएसपी श्रेष्ठ प्रहरी नायब महानिरीक्षक (डीआइजी) बढुवाका मुख्य प्रतिस्पर्धी थिए । श्रेष्ठ नेत्र रोग विशेषज्ञ हुन् भने आचार्य नाक, कान, घाँटी रोग विशेषज्ञ हुन् । यसैगरी मधेश प्रदेशमा रहेका डिआइजी यज्ञविनोद पोखरेलले पर्सा बाहेक तराईका जिल्लाहरुमा आतंक मच्चाएका छन् । यही भदौमा घर जान लागेका डिआइजी पोखरेलले तराईका जिल्ला प्रमुखलाई मधेश प्रदेशको कार्यालयमै बोलाएर काम लगाउने गरेको स्रोतको दावी छ ।

प्रकाशित मिति : १८ असार २०८१, मंगलवार १०:१४

लोकप्रिय