कैलालीको धनगढी उपमहानगरपालिकाले सञ्चालनमा ल्याएको ‘विशेषज्ञ वडा स्वास्थ्य क्लिनिक’ प्रभावकारी बन्दै गएको छ । उपमहानगरले आर्थिक अवस्था कमजोर भएका तथा विपन्न नागरिकका लागि कार्यान्वयनमा ल्याएको उक्त कार्यक्रम प्रभावकारी बन्दै गएको हो ।

चालु आवको साउनदेखि वैशाखसम्म ३९ हजार ४६ जना बिरामीले सेवा लिएका उपमहानगरको स्वास्थ्य शाखा प्रमुख योगेश अवस्थीले जानकारी दिए । उनका अनुसार सो अवधिमा ३० हजार २९७ महिला र आठ हजार ७४९ पुरुषले सेवा लिएका छन् ।

सो कार्यक्रमका लागि एक जना जनरल फिजिसियन, एक जना स्त्री तथा प्रसूतिरोग विशेषज्ञ चिकित्सकका साथै गेटा आँखा अस्पताल तथा धनगढी नेत्रालयको सहकार्यमा आँखारोग विशेषज्ञबाट निःशुल्क सेवा प्रदान गरिएको अवस्थीले बताए ।

स्वास्थ्य शाखा प्रमुख अवस्थीका अनुसार २० हजार ४४४ जनाले जनरल फिजिसियनबाट, सात हजार ५७२ महिलाले स्त्री तथा प्रसूति रोग विशेषज्ञबाट र ११ हजार ३० जनाले आँखासम्बन्धी सेवा लिएका छन् ।

सो अवधिमा सेवा लिनेमध्ये पाँच हजार ८७३ जना ७० वर्षमाथिका ज्येष्ठ नागरिक छन् । पाँच हजार ९३० जनाले निःशुल्क प्रयोगशाला जाँच, पाँच हजार ८४८ गर्भवती सम्बन्धी लिएकामा दुई हजार ५४४ ले निःशुल्क अल्ट्रासाउण्ड गराएका प्रमुख अवस्थीले जानकारी दिए ।

आर्थिक अभावका कारण उपचार गर्न नसक्ने गरिब तथा विपन्न नागरिकको घरदैलोमा पुगेर निःशुल्क विशेषज्ञ स्वास्थ्य सेवा दिने उद्देश्यले गत आवको साउनदेखि उक्त कार्यक्रम १९ वटै वडामा प्रत्येक महिना सञ्चालन हुँदै आएको उनको भनाइ छ ।

‘क्लिनिकमा बिरामीको निःशुल्क जाँचका साथै औषधि पनि निःशुल्क दिने गरिएको छ,’ स्वास्थ्य शाखा प्रमुख अवस्थीले भने, ‘ग्रामीण क्षेत्रका विपन्न नागरिकले निःशुल्क विशेषज्ञ स्वास्थ्य सेवा पाइरहनुभएको छ ।’

उनका अनुसार ज्येष्ठ नागरिक, गर्भवती लगायत वर्गमा यो कार्यक्रम निकै प्रभावकारी बन्दै गएको पाएका छौँ । आव २०७९–८० मा वडा स्वास्थ्य क्लिनिकबाट ३५ हजार ६१९ महिला र १० हजार ७० पुरुष गरी ४५ हजार ६८९ जनाले सेवा लिएका उपमहानगरपालिकाले जनाएको छ ।