बलात्कार अभियोगमा दोषी ठहर भएका सन्दीप लामछानेको मुद्दाको पेसी आजका लागि तोकिएको छ ।

वैशाख २३ गते उच्च अदालत पाटनका न्यायाधीशद्वय नृपध्वज निरौला र दुर्गाप्रसाद ढुंगेलको संयुक्त इजलासमा परेको मुद्दा पेसी सूचीमा चढे पनि हेर्न नमिल्नेमा परेको थियो ।

विपक्षी झिकाउन आदेश भएकै इजलासमा पेसी परेपछि हेर्न नमिल्नेमा परेको उच्च अदालत पाटनका प्रवक्ता तीर्थ अधिकारीले जानकारी दिएका थिए ।

त्यसअघि, न्यायाधीशद्वय मनेन्द्रप्रसाद अवस्थी र दुर्गाप्रसाद ढुंगेलको संयुक्त इजलासले गौशाला २६ (छ)को जन्मदर्ता प्रमाणपत्रसँगै जन्मदर्ताका निम्ति दिइएको निवेदनको सक्कल कपी झिकाउने आदेश गरेको थियो ।

काठमाडौं जिल्ला अदालतले सन्दीपले गौशाला २६ (छ) लाई जबर्जस्ती करणी गरेको ठहर गर्दै आठ वर्ष कैद र तीन लाख रुपैयाँ जरिबाना तथा थप दुई लाख क्षतिपूर्तिको फैसला गरेको थियो । न्यायाधीश शिशिरराज ढकालको इजालसले गरेको फैसलाविरुद्ध सन्दीपले गएको फागुन १० गते पुनरावेदन गरेका थिए ।

काठमाडौं जिल्ला अदालतले गौशाला २६ (छ)लाई बालिग ठहर गरेको तथा सन्दीपलाई न्यूनतम सजाय तोकेको भन्दै त्यसविरुद्ध सरकारी वकिल कार्यालयले पनि पुरावेदन गरेको छ । दुवै मुद्दामा यसअघि नै एकसाथ सुनुवाइ सुरु भइसकेको छ ।

जिल्ला अदालतले दोषी ठहर गरेपछि उच्च पुगेका सन्दीपले मुद्दामा सफाइ पाएको खण्डमा विश्वकपमा सहभागी हुने अवसर बाँकी छ । क्रिकेटप्रेमीहरुले सन्दीपको मुद्दाको यथाशीघ्र फैसला गरेर उनलाई विश्वकप क्रिकेटमा खेल्ने वातावरण बनाउन प्रदर्शन र सामाजिक सञ्जालमार्फत दबाब दिँदै आएका छन् ।

यदि अदालतले सफाइ दिएको खण्डमा विश्वकप खेल्न अमेरिका पुगिसकेको नेपाली टिममा सहभागी हुने अवसर पाउने जनाइएको छ । तर, पटक–पटक विभिन्न कारणले सरेको मुद्दाको सुनुवाइका कारण फैसला हुनेमा संशय भने देखिएको छ ।

केही दिनअघि सन्दीप आफूले पनि सामाजिक सञ्जालमा आफू षडयन्त्रको सिकार भएको जनाउँदै दोषी भएको खण्डमा फाँसी समेत चढ्न तयार रहेको अभिव्यक्ति दिएका थिए ।