फरार प्रतिवादी खोज्दा नेपाल प्रहरीका बहालवाल इन्स्पेक्टर फेला परेका छन् । स्वयम्भू वृतमा कार्यरत प्रहरी निरीक्षक धर्मेन्द्र अकौलिया फरार सूचीमा रहेको भेटिएपछि उनलाई प्रहरीले पक्राउ गरेर अदालतमा बुझाएको छ ।

सहकारी सम्बन्धी मुद्दामा फरार रहेको भेटिएपछि अकौलियालाई निलम्बन गरिएको जिल्ला प्रहरी परिसर काठमाडौँका एसपी नवराज अधिकारीले बताए । प्रहरीले उनलाई अदालतमा उपस्थित गराएको छ ।

धादिङको धुनिवेशी नगरपालिका वडा नम्बर–५ घर भएका इन्स्पेक्टर अकौलियाविरुद्ध मारुती बचत तथा ऋण सहकारीलाई विश्वासघात गरेको कसुरमा प्रहरी वृत्त स्वयम्भूमा २०८० भदौमा जाहेरी दर्ता भएको थियो ।

अनुसन्धान सकेर प्रहरले २०८१ साउनमा अनुसन्धान प्रतिवेदन सरकारी वकिल कार्यालयमा बुझायो । मुद्दा अदालतमा पेस भएर सुनुवाइको प्रक्रियामा छ । सहकारीको सञ्चालक समिति सदस्य समेत रहेका अकौलिया २०८१ भदौ २७ मा सरुवा भएर स्वयम्भू पुगेका हुन् ।

आफ्नै इन्स्पेक्टर फरार सूचीमा रहेको भेटेपछि स्वयम्भू वृत्तका डीएसपी उद्धवसिंह भाटले त्यसबारे काठमाडौँ प्रहरी प्रमुख बसन्त रजौरेलाई खबर गरेका थिए । प्रहरीले उनलाई मंसिर ४ मा काठमाडौँ जिल्ला अदालतमा पेस गरेको थियो ।

एक लाख धरौटी बुझाएर छुटेका अकौलिया स्वतः निलम्बनमा परेका छन् । २०८० वैशाख ५ मा नागार्जुन नगरपालिकाले सहकारीलाई विश्वासघात गरेकोबारे अनुसन्धान गर्न पत्र पठाएपछि प्रहरीले त्यसबारे अनुसन्धान गरेको थियो ।