२०८३ मंसिर ४ , शुक्रबार 20, November 2026, Friday

खाद्य कम्पनीले बाँकेमा खरिद गर्‍यो १५ हजार क्वीन्टल धान

खाद्य व्यवस्था तथा व्यापार कम्पनी लिमिटेड नेपालगन्जले हालसम्म बाँकेका किसानहरुबाट करिब १५ हजार क्वीन्टल धान खरिद गरेको छ । कात्तिक २३ गतेबाट धान खरिद सुरु गरेको कम्पनीले हालसम्म १४ हजार ९३२.२० क्वीन्टल धान खरिद गरेको खाद्य व्यवस्था तथा व्यापार कम्पनी लिमिटेड नेपालगन्जका सुचना अधिकारी शिवराज घिमिरेले बताए ।

उनले जिल्लाका ३९७ जना किसानबाट हालसम्म मोटो धान नौ हजार ९३२.५० क्वीन्टल र मध्यम धान चार हजार ९९९.७० क्वीन्टल गरेर १४ हजार ९३२.२० क्वीन्टल धान खरिद गरिसकेको बताए । सूचना अधिकारी घिमिरेका अनुसार बाँकेका लागि तोकिएको कोटामा मध्यम धान पाँच हजार क्वीन्टल र मोटो धान १५ हजार क्वीन्टल खरिद गर्नुपर्नेमा मध्यम धानको कोटा पुरा भइसकेकोले अबम मोटो धान मात्रै खरिद गरिने बताए ।

उनले नेपालगन्जका लागि २० हजार क्वीन्टल कोटा निर्धारण भएकोले अब कोटा पुरा हुन करिब पाँच हजार क्वीन्टल मात्रै खरिद गर्न बाँकी रहेको बताए । जिल्लामा धान बिक्रिका लागि ६२५ जना किसानले सिफारिस जम्मा गरेको जनाउँदै हालसम्म ३९७ जनाले बिक्री गरिसकेको र कोटा रहुन्जेलसम्म आउनेहरुको धान खरिद गरिने खाद्य व्यवस्था तथा व्यापार कम्पनी लिमिटेड नेपालगन्जले जनाएको छ ।

सो कार्यालयका अनुसार कोटा बढाउन केन्द्रमा अनुरोध गर्दा कोटा वृद्धि हुन नसक्ने जवाफ आएकोले अब कोटा नबढ्ने भएको छ । यस वर्ष जिल्लामा धान उत्पादन विगतको तुलनामा बढी भएकोले खाद्य व्यवस्था कम्पनीले कोटा पनि बढाउनुपर्नेमा झन् गत वर्षभन्दा पनि आधा कोटा निर्धारण गरेर पठाएको जनाउँदै स्थानीय किसानले आक्रोश व्यक्त गरेका छन् । बाँके डुडुवा–३ का नरेश मौर्यले यस पटक धान राम्रो उत्पादन भएकोले मुल्य पनि राम्रो पाइएला भन्ने आशमा आफुहरु रहे पनि खाद्यले निकै कम धान खरिद गर्दा समस्यामा परेको बताए ।

उनले बजारमा व्यापारीहरुले सरकारले तोकेको मुल्यभन्दा करिब एक हजार रुपैयाँ कम प्रति क्वीन्टल धान खरिद गरिरहेकोले किसानलाई निकै समस्या भएको गुनासो गरे । सरकारले आर्थिक वर्ष २०८२–०८३ का लागि मोटा धानको समर्थन मूल्य प्रतिक्वीन्टल तीन हजार ४६३ रुपैयाँ ८१ पैसा तोकेको छ भने मध्यम धानको मूल्य प्रतिक्वीन्टल तीन हजार ६२८ रुपैयाँ ३३ पैसा तोकेको छ ।

प्रकाशित मिति : २०८२ मंसिर २७ गते शनिबार