सत्यपाटी
आज दिउँसो देशभर आंशिकदेखि साधारणतया बदली रहनेछ । देशका एक–दुई स्थानमा आज वर्षाको सम्भावना छ । दिउँसो वाग्मती र गण्डकी प्रदेशका एकदुई स्थानमा भारी वर्षाको सम्भावना छ ।
जल तथा मौसम विज्ञान विभागका अनुसार दिउँसो देशभर आंशिकदेखि साधारणतया बदली रहनेछ । कोसी, मधेस, वाग्मती र गण्डकी प्रदेश लगायत देशका पहाडी भूभागका केही स्थानहरूमा तथा बाँकी भूभागका थोरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ ।
वाग्मती र गण्डकी प्रदेशका एकदुई स्थानमा भारी वर्षाको पनि सम्भावना रहेको विभागले बताएको छ । ‘काठमाडौंमा आज वर्षाको सम्भावना छ,’ मौसमनिवद् सरोज पुडासैनी भन्छन्, ‘दिउँसो १–२ बजेपछि हल्कादेखि मध्यम वर्षा हुने सम्भावना छ ।’ विभागले बताए अनुसार राति देशभर आंशिकदेखि साधारणतया बदली रहनेछ ।
सबै प्रदेशका थोरै स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना छ । अबको तीन दिन देशका एकाध ठाउँबाहेक भारी वर्षाको सम्भावना नरहेको मौसमविद् पुडासैनी बताउँछन् । हाल देशभर मनसुनी वायुको प्रभाव छ । मनसुनको न्यूनचापीय रेखा सरदर स्थानको आसपासमा रहेको विभागले जनाएको छ ।
