नेपालगन्ज उपमहानगरपालिका वडा ७ का रमेश वाल्मीकिले बिगत १५ बर्षदेखि फाइटर भाले पाल्दै आएका छन् । बिगतमा राजापुरमा ब्यक्तिगत रुचीका कारण फाइटर भाले पालेका वाल्मीकी पछिल्लो समय भने नाम र इज्जत कमाउन भाले पाल्दै आएका छन् । उनको घरमा हाल ३ वटा ठुला भाले र ३ वटा सानो चल्ला रहेका छन् ।

उनले नेपाल र भारतका बिभिन्न स्थानमा हुने भाले जुँधाइ प्रतियोगितामा आफुले पालेको भाले लिएर जाने गरेका छन् । भारतको लखनउ, गोण्डा र नेपालका दाङ लगायत स्थानमा भएका भाले जुँधाइमा बाल्मीकिले पालेको भालेले प्रतिष्पर्धा गर्छ । कतिपय स्थानमा आफूले पाएको भालेले लडाइ जित्दा भाले खरिदका लागि ५० हजार रुपैयाँ बढि मूल्य दिनेहरु आए पनि आफूले भाले बिक्री नगरेको उनको भनाइ छ ।

बाल्मीकी भन्छन्, ‘भालेको लडाइ जितेमा भालेको मूल्य बढेसँगै भाले पाल्नेको पनि इज्जत र सम्मान बढ्ने गरेको छ ।’ बाल्मीकिले भारतो नयाँ दिल्ली, लखनउ, गोण्डा लगायतका सहरबाट भालेका चल्ला ल्याएर घरमा पाल्दै आएका छन् । लडाकु भालेका चल्ला पाँच हजारदेखि १०–१० हजारसम्ममा खरिद गरी ल्याउने गरेको बाल्मीकिको भनाइ छ ।

ठुला भालेको मुल्य २५–३० हजार रुपैयाँ भए पनि लडाइ जितेमा भने यसको मूल्य ५० हजारदेखि डेढ लाख रुपैयाँसम्म पुग्ने गरेको उनको अनुभव छ । लडाइमा लैजाने भालेका लागि स्याहारसुसार र खानेकुरामा ध्यान दिनुपर्ने उनले बताए । लडाइमा जाने भाले ५० हजार रुपैयाँ बढी मूल्य दिने आए पनि आफू बिक्री नगरेको उनको भनाइ छ ।

बाल्मीकिले भने, ‘फाइटर भालेलाई लडाइका लागि तयार राख्न काजु, किस्मिस, छोहरा लगायतका बिभिन्न खानेकुरा खुवाउनुपर्ने हुन्छ,’ उनले आफूसँग भालेको सङ्ख्या बढी हुनासाथ चल्ला र ठुला भालेहरु बिक्री गर्दै आएको बताए ।