बाँकेका प्रमूख जिल्ला अधिकारी खगेन्द्रप्रसाद रिजालको अख्तियार दुरुपयोग अनुसन्धान आयोगमा सरुवा भएको छ । सरुवा भएसँगै उनी विवादमा तानिएका छन् । उनलाई कक्षा १० को एसइई परीक्षाको केन्द्र तोक्ने विषयमा नीजि विद्यालयसँग सौदावाजी गरेको आरोप लागेको छ ।नेपाल सरकार (मन्त्रीपरिषद्)को २०८१–११–१२ को निर्णय अनुसार सरुवा भएका प्रजिअ रिजालले एसइई परीक्षा केन्द्र तोक्न नीजि विद्यालयसँग सौदाबाजी गरेको आरोप लागेको हो ।

कोहलपुर नगरपालिकाका नगर प्रमुख पुर्णप्रसाद आचार्यले एसइई परीक्षको केन्द्र तोक्दा नीजि विद्यालयसँग सौदावाजी गरेर मोटो रकम असुलेको आसयसहितको आरोप लगाएका हुन् । सरुवाको पूर्वसन्ध्यामा आगामी चैत ७ गतेदेखि हुने कक्षा १० को एसइईको परिक्षा केन्द्र निर्धारण गर्न राम्रो सौदाबाजी गर्न सफल भएको कोहलपुर नगरपालिकाका नगर प्रमुख पुर्णप्रसाद आचार्यले सामाजिक सञ्जाल फेसबुकमा लेखेका छन् ।

कोहलपुर नगरपालिकाका नगर प्रमुख आचार्यले सामाजिक सञ्जाल फेसबुकमा सरुवा भई जाँदाजाँदै कक्षा १० को एसइई परीक्षा केन्द्र निर्धारण गर्दा केही संस्थागत विद्यालयसँग राम्रै सौदाबाजी गर्नुभएछ भन्दै लेखेका छन्, ‘राज्यको महत्वपूर्ण निकायको एउटा अधिकार प्राप्त व्यक्ति नैतिक रुपमा भ्रष्ट भयो भने समाज कसरी चौपट हुन्छ भन्ने कुराको राम्रो उदाहरण पनि दिन सफल हुनु भएकोमा बधाई छ ।’

नगर प्रमुख आचार्यले सामाजिक सञ्जाल फेसबुकमा खेलेपछि भाईराजाले कमेन्ट गर्दै लेखेका छन्, ‘यदि यो सहि हो जो आफ्नै अधिकारको दुरुपयोग गरेका रहेछन् । उनै प्रजिअ अब अख्तियार दुरुपयोग अनुसन्धान आयोगमा सरुवा भएका छन् । यदि यिनी प्रजिअ हुँदा यहाँ अधिकार दुरुपयोग गर्दै एसइई परिक्षाको सेन्टर सेटिङ गर्नुभएको हो भने यस्ता कर्मचारी अ.दु.अ.मा गएर अझ के के गर्न भ्याउने भए, अ.दु.अ.कै साख अब जोखिममा !

यस्तै रिजन पाण्डेले लेखेका छन्, ‘यो घटनाले हाम्रो शिक्षा प्रणालीमा रहेको गम्भीर समस्यालाई उजागर गरेको छ । एसइई जस्तो महत्वपूर्ण परीक्षाको केन्द्र निर्धारण गर्दा संस्थागत विद्यालयहरूले सौदाबाजी गर्न खोज्नु निकै चिन्ताजनक विषय हो । यसले विद्यार्थीहरूको भविष्य मात्र होइन, सम्पूर्ण शैक्षिक प्रणालीको विश्वसनीयता माथि नै प्रश्न उठाउँछ ।’

पाण्डेले थप अगाडी लेखेका छन्, ‘सरकारी अधिकारीहरू मर्यादित र इमान्दार हुन आवश्यक छ, किनकि उनीहरूको निर्णयले ठूलो प्रभाव पार्छ । यदि कुनै अधिकारीले व्यक्तिगत वा संस्थागत स्वार्थका लागि आफ्नो पदको दुरुपयोग गर्छ भने त्यसको परिणाम सम्पूर्ण समाजले भोग्नुपर्छ । यसकारण, यस्ता घटनाहरूलाई गम्भीरतापूर्वक लिनु आवश्यक छ ।

‘शिक्षा प्रणाली सुधारका लागि पारदर्शीता, इमान्दारी, र जिम्मेवारी अनिवार्य छ । यदि परीक्षा प्रणालीमै धाँधली हुने हो भने योग्य र मेहनती विद्यार्थीहरू अन्यायमा पर्नेछन्, जसले दीर्घकालीन रूपमा राष्ट्रको प्रगतिको मार्ग अवरुद्ध गर्छ । त्यसैले, यस विषयमा सबै सचेत हुनुपर्छ र शिक्षामा कुनै प्रकारको अनियमितता सह्य गर्न हुँदैन ।’

कोहलपुर नगरपालिकाका नगर प्रमुख पुर्णप्रसाद आचार्यले सामाजिक सञ्जाल फेसबुकमा प्रजिअ रिजालमाथि कक्षा १० को एसइई परीक्षको केन्द्र तोक्ने विषयमा नीजि विद्यालयसँग सौदावाजी गरेको आरोप लगाए पनि स्पष्ट प्रमाण भने दिन सकेका छैनन् । यसले नगर प्रमुख र प्रजिअबीचको व्यक्तिगत इगो हो या प्रजिअले सौदाबाजी गरेकै हुन् भन्ने प्रमाणित कसरी गर्ने ?

नगर प्रमुख आचार्यले सामाजिक सञ्जाल फेसबुकमा प्रजिअ रिजालमाथि गम्भीर आरोप लगाउँदै गर्दा सार्वजनीक गर्न नीजि विद्यालय तथा सर्वसाधारणले त्यसको प्रमाण पनि पेश गर्न नगर प्रमुख आचार्यलाई सुझाएका छन् । नीजि विद्यालयका एक सञ्चालकले भने नगर प्रमुख ज्यूले प्रमाणसहित सामाजिक सञ्जालमा लेखेको भए अझ स्पष्ट हुने थियो ।

उनले भने, ‘उहाँँले मनगढन्ते शैलिमा फेसबुकमा कुरा उठान गर्नुभयो । यस्तो गम्भीर कुराको उठान गर्दै गर्दा प्रमाण पनि सार्वजनीक गरेको भए नगर प्रमुख ज्यूले उठाएको विषयमा थप स्पष्ठ हुने थियो । यो त नगर प्रमुख ज्यू र प्रजिअ ज्यूको व्यक्तिगत इगो भएजस्तो गरेर एसइईको विषय बाहिरियो, यसमा विश्वास गर्ने आधार देखिएन ।’

नगर प्रमुख पुर्णप्रसाद आचार्यले सामाजिक सञ्जाल फेसबुकमा खेलेको जस्ताको तस्तै :

सिडियो साब तपाईलाई धन्यवाद

बाँके जिल्लाका सिडियो (CDO) साबको सरुवा भएको खबर छ । सरुवा भई जाँदाजाँदै कक्षा १० को SEE परीक्षा केन्द्र निर्धारण गर्दा केही संस्थागत विद्यालयसँग राम्रै सौदाबाजी गर्नु भएछ । राज्यको महत्वपूर्ण निकायको एउटा अधिकार प्राप्त व्यक्ति नैतिक रुपमा भ्रष्ट भयो भने समाज कसरी चौपट हुन्छ भन्ने कुराको राम्रो उदाहरण पनि दिन सफल हुनु भएकोमा बधाई छ ।

अझै लामो समय निजामती सेवामा रहने र माथिल्लो भूमिकामा पुग्ने निश्चित छ त्यसको लागि शुभकामना पनि छ । तर केही गलत प्रवृतिका पात्रसँगको साँठगाँठ र हिमचिमले कोहलपुरको मर्यादित परीक्षा प्रणालीमा धक्का दिन जुन कोशिस गर्नुभयो, ईतिहासले धिक्कार्ने नै छ । अधिकारको चरम दुरुपयोग गरि सौदाबाजी गर्दै विभिन्न विद्यालयका परीक्षा केन्द्रहरु हेरफेर गर्ने बहानामा जुन खालको अनुचित चलखेल गर्नुभयो ।

तपाईंको यो चलखेलले हामीलाई मद्दत हैन निरुत्साहित गर्ने निश्चित छ । तपाई खै कस्तो प्रलोभनमा पर्नुभयो बिस्तारै खुल्दै जाला, तर सिङ्गो अभिभावकलाई भ्रममा राख्ने र विद्यार्थीको भविष्य चौपट हुने गरि गरिने यस्ता ध्रुत निर्णयको हामी सामना गर्ने नै छौं । हामी शिक्षामा लगानी, शैक्षिक प्रणालीको सुधार, मर्यादित परिक्षा संचालन र गुणस्तरीय शिक्षा प्रती संवेदनशील, जिम्मेवार र जवाफदेही छौं । त्यसैले यो वा त्यो रुपमा हाम्रो हुर्मत लिन कसैले प्रयत्न नगर्न सुझाव छ ।