पछिल्लो पाँच महिनामा देशभरबाट पाँच हजार ८४६ जना फरार प्रतिवादी पक्राउ परेका छन् । अदालतको आदेश कार्यान्वयनका क्रममा विभिन्न आपराधिक क्रियाकलापमा संलग्न भई फरार रहेका प्रतिवादीलाई पक्राउ गरिएको हो ।

नेपाल प्रहरीका प्रवक्ता एवं प्रहरी वरिष्ठ उपरीक्षक विश्व अधिकारीका अनुसार साउनदेखि मंसिरसम्म पक्राउ परेकोमा सबैभन्दा बढी मधेश प्रदेशका एक हजार ५९४ प्रतिवादी रहेका जानकारी दिए । काठमाडौं उपत्यकाबाट एक हजार २५३ जना प्रतिवादी पक्राउ परेका छन् ।

कोशीबाट ७३५, बागमतीबाट २६५, गण्डकीबाट ५०६, लुम्बिनीबाट एक हजार ३५, कणालीबाट १६९ र सुदूरपश्चिम प्रदेशबाट २३५ फरार प्रतिवादीलाई पक्राउ गरी अदालतमा पेस गरिएको प्रवक्ता अधिकारीले जानकारी दिए । केन्द्रीय अनुसन्धान ब्युरोले ५४ जनालाई पक्राउ गरेको छ ।

उनीहरूबाट ४३ करोड ५ लाख ४२ हजार रुपैयाँ जरिवानासमेत तोकिएको छ । उनीहरूबाट कुल कैद एक हजार ९६८ वर्ष नौ महिना आठ दिन भुक्तानी गर्न बाँकी रहेको प्रहरी प्रवक्ता अधिकारीले जानकारी दिए । प्रहरीले चालु आर्थिक वर्षमा फरार प्रतिवादी पक्राउ गर्ने अभियान सञ्चालन गरेको हो ।