सूचनाको शक्ति - The Power Of Information

        

जापानले बनायो ‘मान्छे धुने’ वाशिङ मेसिन !

लुगा कपडा धुनका लागि वाशिङ मेसिनको प्रयोग त गर्नुभएकै होला । तर कुनैबेला मानिसलाई नै धुने वाशिङ मेसिन पनि आउला भन्ने कल्पना चाहिं गर्नुभएको थिएन सायद । तपाईंले सोच्दै नसोचेको यही मेसिन जापानले तयार गरेको छ । आधुनिक प्रविधिको प्रयोगले दैनिक जीवनलाई सरल बनाउँदै लैजाँदा जापानले स्नानको क्षेत्रमा नयाँ आयाम थपेको छ ।

बाथरुमका सामान उत्पादन गर्ने जापानको एक कम्पनीले मानिस धुने वाशिङ मेसिन निर्माण गरेको छ । यो एउटा यस्तो भाँडो हो जसले केवल १५ मिनेटमै मानिसलाई धोएर सफा गराइदिन्छ । ओसाकास्थित कम्पनी ‘साइन्स’ले मानिसलाई सफा गर्नका लागि १५ मिनेटभित्र काम सक्ने ‘मानव धुने मेसिन’को विकास गरेको छ ।

यो मानव वाशिङ मेसिन भविष्यको प्रविधिमा आधारित छ र अहिले केवल प्रोटोटाइप चरणमा मात्र रहेको छ । निकट भविष्यमा यसलाई व्यवसायिक रुपमा उत्पादन गरेर घर तथा आतिथ्य क्षेत्रहरुका लागि लञ्च गर्ने योजना कम्पनीको छ । यो मेसिन सन् १९७० को जापान वर्ल्ड एक्सपोजिसनमा प्रदर्शित एउटा मिल्दोजुल्दो मेसिनबाट प्रेरित भएर तयार गरिएको छ ।

जापानी सञ्चार माध्यम द असाही शिम्बुनका अनुसार यस प्रविधिको प्रेरणा १९७० को जापान वर्ल्ड एक्स्पोबाट लिइएको हो । उक्त समयमा सान्यो इलेक्ट्रिक कम्पनीले ‘अल्ट्रासोनिक बाथ’ नामक अण्डाकार स्नान मेसिन सार्वजनिक गरेको थियो । उक्त मेसिनले तातो पानी, मसाज बल र अल्ट्रासोनिक प्रविधिको प्रयोग गरी मानिसलाई सफा गर्थ्यो ।

त्यसबेला सान्यो इलेक्ट्रिक कम्पनी (हालको प्यानासोनिक कम्पनी)ले एउटा अण्डाकार अल्ट्रासोनिक बाथ सार्वजनिक गरेको थियो । यो मेसिनमा कुनै व्यक्ति बस्दा त्यो अटोमेटिक रुपमा तातो पानीले भरिन्थ्यो । त्यसमा अल्ट्रासोनिक तरंग तथा मसाजको सुविधा पनि थियो र पछि पानी आफै निस्किन्थ्यो । यद्यपि अल्ट्रासोनिक बाथ त्यो बेला लोकप्रिय बन्न सकेन ।

तथापि यसले एकजना बालकलाई भने निश्चित रुपमा प्रेरित गर्यो । उनी बाल्यकालमा आफू उक्त एक्स्पोमा सहभागी भएको र त्यहाँबाट प्रेरणा लिएको बताउँछन् । ती बालकको नाम थियो यासुआकी ओयामा, जो अहिले साइन्स कम्पनीका अध्यक्ष हुन् । ‘साइन्स’का अध्यक्ष यासुआकी अओयामा सोही प्रविधि पुनः सिर्जना गर्ने लक्ष्यसहित अगाडि बढेका छन् ।

जापानको हस्पिटालिटी बजारका लागि बाथरुमका स्नान सम्बन्धी उपकरणहरु बनाउने साइन्स कम्पनीले बनाएको मानव वाशिङ मेसिनको नाम मिराइ निंगेन सेन्टाकुकी हो । आगामी अप्रिल महिनामा हुने प्रदर्शनीमा यो मेसिन पहिलोपटक सार्वजनिक गरिनेछ । साइन्स कम्पनीले बनाएको यो मेसिनमा आर्टिफिसियल इन्टेलिजेन्स प्रविधि तथा सेन्सर रहेको छ ।

जसले मानिसको सरीरको अवस्था हेरिकन ठिक्कको तापक्रमको पानी छाड्दछ । साथै नुहाउने बेलामा सम्बन्धित व्यक्तिले पारदर्शी खोलमा विभिन्न खालका आनन्ददायक भिडियोहरु पनि हेर्दछ । कम्पनीले तयार पारेको मानिस धुने वाशिङ मेसिनले स साना माइक्रो बबल्स छाड्दछ जसले उत्कृष्ट सफाइमा सहयोग गर्दछ ।

यो मेसिनले भविष्यमा स्नानको अनुभवलाई बदल्ने क्षमता राख्दछ र आधुनिक प्रविधिको साथमा सफाइ प्रक्रियालाई स्वचालित तथा कुशल बनाउने दाबी कम्पनीले गरेको छ । यो मेसिन निर्माणको परियोजना करिब ७० प्रतिशत सम्पन्न भैसकेको कम्पनीका अध्यक्ष तथा यसका परिकल्पनाकार आयोमा बताउँछन् । भविष्यमा यो मेसिन अन्य आम घरायासी विद्युतीय उपकरण जस्तै आम प्रचलनमा आउने विश्वास पनि उनको छ ।

मेसिनको विशेषता

‘मिराई निङ्गेन सेन्टाकुकी’ नाम दिइएको यस मेसिनमा प्रयोगकर्ता एउटा विशेष ककपिटमा बस्नुपर्नेछ । मेसिनले सेन्सरको सहायताले मुटुको गति, तनाव स्तरजस्ता स्वास्थ्य सम्बन्धी विवरणहरू मापन गर्छ र त्यस आधारमा पानीको तापक्रम, दबाब तथा भित्री वातावरण अनुकूल बनाउँछ । मेसिनले उच्च गतिको पानी र सूक्ष्म बबलको प्रयोग गरी शरीर सफा गर्छ ।

साथै, भित्र प्रोजेक्टरको सहायतामा दृश्य र सङ्गीत पनि हेर्न र सुन्न सकिन्छ । जसले प्रयोगकर्ताको मनमस्तिष्कलाई पनि शान्त बनाउने कम्पनीले विश्वास गरेको छ । यो मेसिन शारीरिक असक्षमता भएका व्यक्तिहरूका लागि उपयोगी हुने विश्वास लिइएको छ । नुहाउनका लागि अरूको सहयोग आवश्यक पर्ने व्यक्तिहरूका लागि यसले आत्मनिर्भरता बढाउने अपेक्षा गरिएको छ ।

२०२५ मा सार्वजनिक

‘साइन्स’ले यस मेसिनलाई आगामी २०२५ मा हुने ओसाका एक्स्पोमा सार्वजनिक गर्ने तयारी गरिरहेको छ । एक्स्पोमा सहभागी व्यक्तिहरूले दैनिक रूपमा मेसिनको प्रयोग अनुभव गर्न पाउनेछन् । कम्पनीले यसलाई भविष्यमा घरायसी प्रयोगका लागि बजारमा उपलब्ध गराउने योजना पनि बनाएको छ । यो नवीन आविष्कारले स्नान संस्कृतिलाई विज्ञानसँग जोड्दै नयाँ युगको सुरुआत गर्ने विश्वास गरिएको छ ।

स्रोत : एजेन्सी
प्रकाशित मिति : २० मंसिर २०८१, बिहीबार ०६:३८

लोकप्रिय