कर्णालीमा अझै पनि आयोडिनयुक्त नुन पुर्‍याउनै कठिन छ । साल्ट ट्रेडिङ कर्पोरेशन लिमिटेडले कर्णालीका सबै डिपोहरुमा नुन ढुवानी गरिरहेको छ । सरकारले ढुवानी भाडामा अनुदान दिइ साल्ट ट्रेडिङले कर्णालीका जिल्लामा आयोडिनयुक्त नुन सहुलियतामा बिक्री गर्दै आएको छ । उपल्लो डोल्पाको तिन्जे बिक्री केन्द्रबाहेक अन्य ठाउँमा आयोडिनयुक्त नुन पुर्‍याउने क्रम जारी रहेको साल्ट ट्रेडिङ कर्पोरेशन लिमिटेडको प्रदेश कार्यालय, नेपालगन्जका प्रमुख मनोज चौधरीले जानकारी दिए ।

चीन सरकारले अनुमति नदिएका कारण उपल्लो डोल्पामा नुन ढुवानी गर्न नसकिएको साल्ट ट्रेडिङले जनाएको छ । कर्णालीका पूरै र लुम्बिनीमा आयोडिनयुक्त नुन नेपालगन्जबाट ढुवानी गरिँदै आएको छ । कर्णालीका हुम्ला, मुगु र डोल्पामा आयोडिनयुक्त नुन नपुग्ने समस्या यो वर्ष समाधान भएको प्रमुख चौधरीले जानकारी दिए । कर्णालीका जिल्लाहरुमा प्रतिपोका रु नौ रुपैयाँले आयोडिनयुक्त नुन बिक्री हुने गरेको छ । ढुवानीमा अनुदानका कारण उक्त नुन प्रतिकिलो नौ रुपैयाँ परेको उनले बताए ।

डोल्पाको सदरमुकाम दुनैमा दुई हजार पाँच क्वीन्टल कोटामध्ये हालसम्म एक हजार १०० क्वीन्टल नुन ढुवानी भइसकेको छ । जुफाल डिपोमा ५०० मध्ये ३०० क्वीन्टल, काइगाउँमा ३०० कोटामध्ये हालसम्म नुन पुर्‍याइएको छैन । ढुवानीको क्रममा बाटोमै रहेको साल्ट ट्रेडिङले जनाएको छ । त्रिपरासुन्दरीको लिकुमा ३०० कोटा निर्धारण गरिएकामा ढुवानीको क्रममा रहेको प्रदेश कार्यालय, नेपालगन्जका प्रमुख चौधरीले जानकारी दिए । मुडकेचुलाको सर्मीमा ३०० क्वीन्टलमा सबै नुन पुगेको उनको भनाइ छ ।

तिन्जेमा एक हजार आठ क्वीन्टल कोटा निर्धारण गरेकामा हाल सम्म पुर्‍याउन सकेको छैन । हुम्ला सदरमुकाम सिमीबोटमा एक हजार ६०० क्वीन्टल कोटा निर्धारण गरिएकामा हालसम्म एक हजार १५० क्वीन्टल ढुवानी भइसकेको छ । याल्वाङ डिपोमा ५०० क्वीन्टल कोटा निर्धारण गरिएकामा हालसम्म ढुवानी हुन सकेको छैन । सार्केगाडमा ९०० क्वीन्टलमध्ये ढुवानीको क्रममा बाटोमा रहेको प्रदेश प्रमुख चौधरीले जानकारी दिए । श्रीकोट डिपोमा ९०० क्वीन्टल कोटा भएकोमा ढुवानीको क्रममा छ ।

सदरमुकाममा भने हवाई मार्गबाट नुन ढुवानी गर्ने कार्ययोजना रहेको छ । श्रीकोट र सार्केगाड साल्ट ट्रेडिङ् कर्पोरेशनका बिक्री केन्द्र हुन् । मुगु सदरमुकामका डिपोमा दुई हजार ५०० क्वीन्टलको कोटा रहेकामा हालसम्म एक हजार १०० क्वीन्टल ढुवानी भइसकेको छ । बाँकी ढुवानीको क्रममा छ । सोरुकोटमा नौ सय क्वीन्टलमध्ये ५०० क्वीन्टल ढुवानी भएको छ । श्रीकोटमा ९०० क्वीन्टल ढुवानी भएको छ । मुगुमकार्मरोङ गाउँपालिकामा एक हजार क्वीन्टल कोटा रहेकामा हालसम्म ढुवानी भएको छैन ।

सदरमुकामबाट नै यहाँको माग र आपूर्ति व्यवस्था हुँदै आएको साल्ट ट्रेडिङले जनाएको छ । जुम्लाका सबै स्थानीय तहमा नुन पुर्‍याउन स्थानीय तहहरुसँग सहकार्य भइ सोही अनुसार ढुवानी भइरहेको चौधरीले जानकारी दिए । उनका अनुसार सदरमुकाममा चार हजार क्वीन्टलमध्ये दुई हजार १५० क्वीन्टल ढुवानी भएको छ । नराकोटमा एक हजारमा हालसम्म ४५० क्वीन्टल पठाएको छ । गोरुचौरमा एक हजारमध्ये ५०० क्वीन्टल नुन पुर्‍याएको छ ।

जाजरकोटका सात पालिकामध्ये सदरमुकामसहित चार ठाउँमा नुन बिक्री हुँदै आएको छ । सदरमुकाममा दुई हजार ५०० मा एक हजार २०० मात्र ढुवानी भएको छ । नलगाडको दल्लीमा एक हजार पाँचमा ६०० क्वीन्टल ढुवानी भएको छ । पश्चिम जाजरकोटको थलहमा एक हजार २०० क्वीन्टलमध्ये ४५० क्वीन्टल ढुवानी भएको छ । तागामा ३०० क्वीन्टल कोटामध्ये सबै पुगेको छ । रुकुम पश्चिममा चार हजार ५०० क्वीन्टल कोटामध्ये हालसम्म ८५० क्वीन्टल ढुवानी भएको छ । चौरजहारीमा ८०० क्वीन्टलमध्ये ३४० क्वीन्टल मात्र ढुवानी भएको छ ।

कालिकोटमा तीन हजार ५०० क्वीन्टलमध्ये ७५० क्वीन्टल ढुवानी भएको छ । रासकोट डिपोमा एक हजार २०० क्वीन्टलमध्ये २४० क्वीन्टल ढुवानी भएको छ । बाँकी ढुवानीको प्रक्रियामा छ । ठेक्का प्रक्रियाबाट ढुवानी हुने भएकाले ढुवानीकर्ताले आफू अनुकुलमा ढुवानी गर्दै आएका छन् । उपल्लो डोल्पामा कोभिडदेखि आयोडिन युक्त नुन ढुवानी हुन सकेको छैन । हिमाली जिल्लाहरुमा चिसो र हिमपातका कारण नुन ढुवानीमा समस्या हुने गरेको छ । उपल्लो डोल्पा, हुम्लाको माथिल्लो भाग र मुगुको माथिल्लो क्षेत्रमा ढुवानीमा समस्या हुँदै आएको छ ।

स्थानीय तहहरुले समन्वय गरेर नुन लिएमा सबेलाई सहज हुने लिमिटेडको भनाइ छ । हाल निर्धारण गरिएको नुनको कोटा कर्णालीको हालको जनसङ्ख्यलाई अपुग भएको स्थानीय तहका प्रमुखहरुले बताउँदै आएका छन् । दैलेखमा नुनको बिक्री केन्द्र नै छैन । कर्णालीको सबै स्थानीय तहमा साल्ट ट्रेडिङसँग सहकार्य गरेर नुन लिन पुर्‍याउन सकेमा सबैका लागि सजिलो हुने साल्ट ट्रेडिङले जनाएको छ । आयोडिनयुक्त नुनको आवश्यकता र माग दुवै उच्च रहेको स्थानीय तहका प्रमुखहरु बताउँछन् । साल्ट ट्रेडिङले सीमित कोटा निर्धारण गर्दा बर्सेनी कर्णालीका स्थानीयवासीका लागि नुन अपुग हुने गरेको पूर्वमन्त्री गणेश सिंहले बताए ।