बाँकेमा चट्याङ लागेर एक जना महिलाको मृत्यु भएको छ ।तीन जना महिला घाइते भएका छन् ।

राप्तीसोनारी गाउँपालिका वडा नम्बर ८ खल्ला गाउँकी ४० बर्षीया पुतला खत्रीकोे आज अपरान्ह साढे ४ बजेतिर परेको चट्याङबाट घटनास्थलमै मृत्यु भएको प्रहरी चौकी ढकेरीले जनाएको छ ।

आफ्नो गाउँदेखि अन्दाजी एक किलोमिटर उत्तरतर्फ रहेको घण्टेश्वरी सामुदायिक वनमा बाख्रा चराउन गएको अवस्थामा हावाहुरी र पानीसहित परेको चट्याङबाट सोही ठाउँका ४२ बर्षकी देबा घर्ती, ३६ बर्षकी लिला खत्री र २६ बर्षकी कलसी बुढा घाइते भएको प्रहरीले जनाएको छ ।

घाइते सबैको स्थानीय मेडिकलमा उपचार भइरहेको छ । चट्याङ लागेर तीन वटा बाख्रा पनि मरेका छन् ।