सूचनाको शक्ति - The Power Of Information

        

‘प्रधानमन्त्री कृषि आधुनिकीकरण परियोजना’ प्रभावकारी, कृषि उत्पादनमा वृद्धि

बाँके जिल्लामा प्रधानमन्त्री कृषि आधुनिकीकरण परियोजना प्रभावकारी बन्दै गएको छ । सो परियोजना सञ्चालनमा आएपछि जिल्लाको खजुरा गाउँपालिकामा कृषि बाली उत्पादन बढ्नुका साथै कृषकको जीवनस्तरमा सुधार आएको छ । उक्त कार्यक्रमबाट तरकारी खेती गरेका किसान क्रमशः आत्मनिर्भर बन्न थालेका छन् ।

सो परियोजनामार्फत किसान कृषि समूह बनाएर तरकारी पकेट क्षेत्रमा आबद्ध भएका छन् । उनीहरूले उत्पादन गरेको तरकारी तथा फलफूलको माग बाँके जिल्लामै उच्च रहेको पाइएको छ । बाँकेको खजुरा गाउँपालिका–३ बी गाउँका कृषक राजकुमार गुरुङले आफूहरूले गरेको तरकारी खेतीबाट उत्पादित तरकारीलाई बजारको कुनै समस्या नरहेको बताएका छन् ।

उनले तरकारी नेपालगन्जसम्म पुर्याउन केही समस्या भएपनि बजारको कुनै चिन्ता नरहेको बताए । पछिल्लो समयमा बाँकेमा राम्रो तरकारी उत्पादन भइरहे पनि नेपालगन्जका ठुला तरकारी व्यापारीले भारतबाट तरकारी ल्याउँदा स्थानीय कृषक मर्कामा परेको अधिकांश किसानको गुनासो छ ।

खजुराकै अर्का किसान रमेश थापाले ठुला व्यापारीले भारतबाट ठुलो मात्रामा तरकारी ल्याउँदा स्थानीय तरकारीले भाउ नपाउने र थोक व्यापारीले लिन नमान्दा किसानले सस्तोमा बिक्री गर्नुपर्ने बाध्यता रहेको गुनासो गरे । तरकारी खेतीमा लागेका विभिन्न कृषि समूहलाई अन्य सङ्घसंस्थाले पनि प्राविधिक सहयोग गर्दै आएका छन् ।

पालिकाका विभिन्न वडामा तरकारी पकेट क्षेत्र सञ्चालन गरी अनुदान दिइएको र अझै तीन वर्षसम्म सहयोग गर्ने खजुरा गाउँपालिकाका अध्यक्ष डम्बरबहादुर विकले बताए । उनले प्रधानमन्त्री कृषि आधुनिकीकरण परियोजनाले स्थानीय किसानको जीवनस्तर उकास्न ठुलो सहयोग गरिरहेको बताए । भारतीय तरकारी आयात रोक्न सके खजुरा क्षेत्रले नेपालगन्जलाई आवश्यक तरकारीको माग पूरा गर्न सक्ने जिकिर अध्यक्ष विकले गरे ।

कृषि क्षेत्रको विकासका लागि खजुरा गाउँपालिकाले विशेष रणनीतिअनुसार काम गर्दै आएको छ । पालिकाका अध्यक्ष विकले किसानलाई कृषि क्षेत्रमा आकर्षण गर्ने कार्यक्रम र योजनालाई प्राथमिकता दिएको जानकारी दिए । उनका अनुसार क्रमशः खजुरा क्षेत्र तरकारी र कृषि उत्पादन पकेट क्षेत्रका रूपमा परिचित हुँदै गएको छ ।

प्रकाशित मिति : १ बैशाख २०८१, शनिबार १८:२९