सूचनाको शक्ति - The Power Of Information

        

किन हुन्छ ढाड दुखाइको समस्या ?

ढाड दुख्ने समस्या हामी सबैले जीवनको कुनै न कुनै समयमा भोगिरहेका हुन्छौं । हरेक १० जनामा ८ जनाले आफ्नो जीवनकालमा ढाड दुख्ने समस्या भोग्नु परेको हुन्छ ।

सामान्यतः ढाड दुखाइ उमेर बढ्दै गएपछि देखिन्छ, तर अहिलेको अवस्थामा ढाड र कम्मर दुखाइ युवा अवस्थामा देखा परिरहेको छ । ढाडको दुखाइ हुनु भनेको मेरुदण्डको हड्डी, नसा च्यापिँदा, त्यहाँको कुरकुरे हड्डी यानिकी डिस्क वा सम्बन्धित मांसपेशीको दुखाइ नै हो ।

यस्तो दुखाइ छोटो समयको लागि वा लामो समयको लागि पनि हुन सक्छ । मेरुदण्डको लामो दुखाइले मानिसको दैनिकीमा प्रभाव पार्ने भएकोले यसले अप्रत्यक्ष रूपमा सामाजिक एवं आर्थिक रूपमा नै प्रभाव पारिरहेको हुन्छ । ढाडको दुखाइ धेरैजसो २० देखि ३० वर्षका युवामा देखिने गर्छ । दुखाई सामान्य किसिमको छ भने सामान्य उपचारले नै निको पार्न सकिन्छ ।

ढाड दुख्ने कारणहरू के–के हुन् ?

  • उमेर बढ्दै जाँदा मानिसमा ढाडको हड्डी खिइने, हड्डी पातल समस्याले गर्दा ।
  • अव्यवस्थित जीवनशैली, खानपिन, बसाइ नमिल्दा ।
  • बालबालिका र युवाहरूमा बाङ्गिएको मेरुदण्ड भएकाले ।
  • मधुमेह, मोटोपना, तनाव, गर्भवती महिला, स्पाइनको क्यान्सर, किड्नीको इन्फेक्सन आदिका कारण ।
  • कामको बढ्दो बोझ ।
  • मेरुदण्ड चिप्लिनु ।
  • मेरुदण्डको हड्डी सर्नु, हड्डी भाँच्चिनु, जोर्नी खिइएर जानु ।
  • हाड कमजोर हुनु ।
  • पेटमा हुने समस्या, दिसा–पिसाबमा हुने इन्फेक्सनका कारण पनि ढाड दुख्ने हुन्छ ।
  • नशा च्यापिनु ।
  • पित्त थैलीको स्टोनले गर्दा ।

कस्ता व्यक्तिमा ढाड दुखाइको समस्या बढी हुनसक्छ ?

  • उमेर बढ्दै जाँदा ।
  • हड्डी कमजोर हुने बेलामा जस्तै ६० नाघेका व्यक्तिमा ।
  • दैनिकी कामले जस्तै एउटै पोजिसनमा बसेर काम गर्ने व्यक्तिमा ।
  • धेरै धूम्रपान मद्यपान गर्ने व्यक्तिलाई ।
  • कम्प्युटरमा बढी समय काम गर्ने, सुतेर पढ्ने, सुतेर काम गर्ने, सुतेर मोबाइल चलाउने, सुतेर टिभी हेर्ने व्यक्तिमा ।

प्रकाशित मिति : २४ चैत्र २०८०, शनिबार ०९:२६