नेपालगन्ज मेडिकल कलेजद्वारा सञ्चालित नेपालगन्ज शिक्षण अस्पतालमा पहिलो पटक अवेक क्रेनियोटोमी गरी सात दिनभित्र दुई वटा जटिल किसिमका ब्रेन ट्युमरको सफल शल्यक्रिया गरिएको छ ।

नेपालगन्ज मेडिकल कलेजका प्रबन्ध निर्देशक डा. सुरेशकुमार कनौडियाका अनुसार नेपालगन्जस्थित शिक्षण अस्पतालले पश्चिम नेपालमै जटिल खालको यो शल्यक्रिया पहिलो पटक नेपालगन्जमा सम्पन्न गर्न सफल भएको हो ।

उहाँले अन्नपूर्ण न्यूरो अस्पताल काठमाडौंको सहकार्यमा मेडिकल कलेजमा न्यूरो साइन्स विभाग सञ्चालनमा आएपछि यस्तो प्रकारको अति नै जटिल खालको शल्यक्रिया सम्भव भएको बताउनुभयो ।

नेपालगन्ज उप–महानगरपालिका ११ का रेखा कश्यप र वीरेन्द्रनगर नगरपालिका–१ सुर्खेतकी दीपा गौतमको अवेक क्रेनियोटोमी गरी ब्रेन ट्युमरको शल्यक्रिया सफलतापूर्वक गरिएको शिक्षण अस्पतालले जनाएको छ ।

एक हप्ताको बिचमा शल्यक्रिया गरिएका दुबै जना बिरामीको अवस्था सामान्य रहेको र उनिहरुलाई डिस्चार्ज गरेर घर पठाइएको प्रबन्ध निर्देशक डा. कनौडियाले बताउनुभयो ।

सो दुबै जटिल शल्यक्रियामा न्यूरोसर्जन डा.मनीष कोलाक्षपति, डा.निरज घिमिरे, डा.सुबोध गौतम, डा.उपमा शर्मा र एनेस्थेसिया विभागबाट डा.नवीन कुमार रेग्मी, डा.कपिल पोख्रेललगायतको टिम सहभागी रहेको अस्पतालले जनाएको छ ।

अवेक क्रेनियोटोमी ब्रेन ट्युमर शल्यक्रिया भनेको बिरामीलाई अर्धचेत अवस्थामा राखी मस्तिष्कमा भएको ट्युमर निकाल्ने एक प्रकारको शल्यक्रिया भएको चिकित्सकहरुले बताएका छन् ।

अन्नपूर्ण न्यूरो अस्पताल काठमाडौंको सहकार्यमा नेपालगन्ज मेडिकल कलेजमा न्यूरो साइन्स विभाग सञ्चालनमा आएपछि पश्चिम नेपालका बिरामीहरुले न्यूरोसम्बन्धी उपचारका लागि भारतको लखनउ र नेपालको काठमाण्डौ जानुपर्ने बाध्यताको अन्त्य हुँदै गएको छ ।