बाँकेको डुडुवा गाउँपालिकाले छात्रा प्रोत्साहन कार्यक्रम अन्तरगत एसइई पास गरेका छात्राहरुलाई साइकल वितरण गरेको छ । घरदेखि टाढा बजारसम्म गएर उच्च शिक्षा हासिल गर्न सहजता तथा उत्प्रेरणाका लागि गाउँपालिका अन्र्तगतका सामुदायिक विद्यालयहरुका छात्रालाई साइकल वितरण गरिएको हो ।

२०७९ सालमा एसइइ पास गरेका गाउँपालिकाका ७ वटा माध्यमिक विद्यालयका ९२ जना छात्रालाई साइकल वितरण गरिएको शिक्षा शाखाका स्रोतव्यक्ती राम एकबाल मण्डलले बताए । साइकल वितरण गर्दै गाउँपालिकाका अध्यक्ष नरेन्द्रकुमार चौधरीले किशोरीहरुलाई उच्च शिक्षा हासिल गर्न प्रोत्साहन गरेको भन्दै भोलीका दिनमा उच्च शिक्षा हासिल गर्न टाढा तथा बजारसम्म आउजाउ गर्न मद्दत पुग्ने बताए ।

उनले विशेषगरी मधेशी समुदायका किशोरीहरु साधारण कक्षा पढेपछि विभिन्न कारणले उच्च शिक्षा हासिल गर्न नसकेको समस्यालाई यो कार्यक्रमले अन्त्य गर्ने विश्वास व्यक्त गरे । अध्यक्ष चौधरीले शिक्षा भनेको उज्यालोको प्रकाश भएकाले बालबालिकालाई शिक्षातर्फ विशेष ध्यान दिनुपर्नेमा जोड दिँदै पालिकाभित्र सञ्चालित विद्यालयहरुमा शैक्षिक गुणस्तरियताका लागि पहिलो चरणमा आधारभुत विद्यालयलाई सिसी क्यामरामार्फत निगरानी सुरु गरिएको बताए ।

उनले डुडुवाले संस्कार शिक्षालाई जोड दिँदै आगामी शैक्षिक सत्रबाट स्थानीय पाठयक्रम तयार गरि लागु गर्न लागेको बताए । आ–आफ्नो घरमा नैतिकतासँगै संस्कारको बातावरण तयार गर्न यो शिक्षा दिन लागेको उनको भनाई छ । कार्यक्रममा उपाध्यक्ष शाहिदा बानो, वडाध्यक्षहरु दुर्गाप्रसाद बर्मा, आमोद तिवारी, प्रमुख प्रशासकिय अधिकृत गिरबहादुर सेजुवाल, विभिन्न विद्यालयका शिक्षक, अभिभावक, विद्यार्थी लगायतको सहभागिता रहेको थियो ।

साइकल वितरण कार्यक्रममा नेकपा एमालेबाट निवार्चित वडाध्यक्षसहितका केही जनप्रतिनिधिहरुले कार्यक्रमलाई बिथोल्ने प्रयास गरेका थिए । कार्यक्रममा एक्कासी प्रबेश गरेर अनावश्यक वादविवाद सिर्जना गरि कार्यक्रम विथोल्ने प्रयास गरेको अध्यक्ष चौधरीले बताए । अध्यक्ष चौधरीले भने, ‘राजनतिक विवादका विषयमा छलफल गर्नुछ भने मसंग समय लिनुस अनी बसेर संवाद गरौं, यसरी औपचारिक कार्यक्रमलाई भाड्न पाइँदैन ।’

उनले सबै समस्याको अन्त्य छलफलमार्फत हुने भएकाले संवादमा जानुपर्नेमा जोड दिँदै सामाजिक सञ्जालमार्फत विभिन्न किसिमका झुठा आरोप लागएर अरुलाई पनि भ्रममा पार्ने काम नगर्न आह्वान गरे । गाउँपालिकाले अहिलेसम्म गरेको विकास तथा राम्रा कामहरु सबै जनतासामु छर्लङ्ग छ, विश्वास लाग्दैन भने फिल्ड गएर हेर्न अनुरोध गरे ।