सूचनाको शक्ति - The Power Of Information

        

बेनीमा ग्याङफाइट: खुकुरी प्रहारबाट एक जनाको मृत्यु, एक घाइते

 म्याग्दीको बेनीमा ग्याङ फाइट हुँदा एक जनाको मृत्यु भएको छ भने एक जना घाइते भएका छन् ।

बिहीबार साँझ बेनी नगरपालिका- ८ क्याम्पसचोकमा अन्धाधुन्ध धारिलो हतियार प्रहारबाट रघुगंगा गाउँपालिका- १ बेगका घर भई हाल बेनी नगरपालिका- ८ पिपलचोक बस्ने २१ वर्षीय सुशिल गर्वुजाको मृत्यु भएको हो ।

धारिलो हतियार प्रहारबाट उनी गम्भीर घाइते भएका थिए । घाइते सुशिलको जिल्ला अस्पताल बेनीमा उपचारको क्रममा मृत्यु भएको जिल्ला प्रहरी कार्यालय म्याग्दीका प्रमुख डिएसपी मदन कुवँरले बताए ।

मृतकका साथी बेनी नगरपालिका- ६ अथुङ्गेका अनुराग शाहीको हातमा चोट लागेको छ ।सदरमुकाम बेनीमा जारी प्रथम म्याग्दी कप भलिबलको खेल हेरेर फर्किएको टोलीलाई अर्को समूहले आक्रमण गरेको हो ।

‘घटनामा संग्लनको पहिचान भइसकेको छ । उनीहरुको खोजिमा लागेका छौँ । छिट्टै पक्राउ गरेर सत्यतथ्य बाहिर ल्याउँछौँ’, डिएसपी कुवँरले भने ।

मृतक युवासहितको समूह सवार मोटरसाइकललाई अर्को समूहले घेरेर प्रहार गरेको प्रत्यक्षदर्शीले बताएका छन् ।

प्रकाशित मिति : १२ माघ २०८०, शुक्रबार ०८:४२