खाद्य व्यवस्था तथा व्यापार कम्पनी कर्णाली प्रदेशले १९ हजार ४६४ मेट्रिक टन रैथाने बाली खरिद गर्ने भएको छ । जसमध्ये सबैभन्दा धेरै सिमी चार हजार ४७० मेट्रिक टन खरिद गर्ने व्यापार कम्पनीले जनाएको छ ।

व्यापार कम्पनीले कोदो आठ हजार ६६०, कागुनो ३३८, चिनो ६८७, जुनेलो दुई, फापर ७६२, उवा ६१९, मार्सी धान तीन हजार ८८६ र सिमी चार हजार ४७० गरी कुल जम्मा १९ हजार ४६४ मेट्रिक टन रैथाने बाली खरिद गर्ने सहमति भएको छ ।

कर्णाली प्रदेश भूमि व्यवस्था, कृषि तथा सहकारी मन्त्रालय र खाद्य व्यवस्था तथा व्यापार कम्पनी लिमिटेड कर्णाली प्रदेशबीच समझदारी पत्रमा हस्ताक्षर भएको हो । कर्णाली प्रदेशमा उत्पादित रैथानेबालीको सङ्कलन, प्रशोधन र बजारीकरणका लागि प्रशोधन केन्द्र स्थापना गर्नेसम्बन्धी मन्त्रालय र व्यापार कम्पनीबीच समझदारी भएको हो ।